Assam CM statement on second marriage: দ্বিতীয় বিবাহ সন্দৰ্ভত মুখ্যমন্ত্ৰীৰ স্পষ্টীকৰণ

দ্বিতীয় বিবাহৰ বাবে অনুমতি লোৱাৰ চৰকাৰী নিদেৰ্শনাৰ‌‌ বিষয়টো স্পষ্ট কৰি দিলে মুখ্যমন্ত্ৰীয়ে ৷

গুৱাহাটী, ২৭ অক্টোবৰ :দ্বিতীয় বিবাহৰ বাবে অনুমতি লোৱাৰ ক্ষেত্ৰত চৰকাৰে জাৰি কৰা নিদেৰ্শনা হিন্দু মুছলমান সকলো লোকৰে ক্ষেত্ৰত প্ৰযোজ্য হ’ব ‌বুলি‌ মুখ্যমন্ত্ৰী হিমন্ত বিশ্ব শৰ্মাই গুৱাহাটীত শুকুৰবাৰে সাংবাদিকৰ আগত স্পষ্ট কৰি দিয়ে । তেওঁ কয় যে দ্বিতীয় বিবাহৰ বাবে অনুমতি লোৱাৰ ক্ষেত্ৰত চৰকাৰে জাৰি কৰা নিদৰ্শনা হিন্দু, মুছলমান তথা সকলো ধৰ্মাৱলম্বী ৰাজ্য চৰকাৰৰ চাকৰিয়ালৰ ক্ষেত্ৰত প্ৰযোজ্য হ’ব ।

উল্লেখ্য যে, অসম চৰকাৰৰ যিকোনো চাকৰিয়ালে দ্বিতীয় বিবাহ কৰোৱাৰ আগত বিভাগীয় চৰকাৰী অনুমতি লোৱাটো বাধ্যতামূলক কৰিছে চৰকাৰে । এই‌ সন্দৰ্ভত দিছপুৰৰ পৰা চৰকাৰী পক্ষই কঠোৰ নিৰ্দেশনা দিছে ।‌ চৰকাৰী অনুমতি অবিহনে ৰাজ্য চৰকাৰৰ কৰ্মচাৰী স্বামী বা স্ত্ৰীয়ে কৰিব নোৱাৰিব দ্বিতীয় বিবাহ ৷ The Assam Civil Services (Conduct) Rules 1965 ৰ 26 ৰ বিধান অনুসৰি অসম চৰকাৰৰ অতিৰিক্ত মুখ্য সচিব নীৰজ বাৰ্মাৰ স্বাক্ষৰিত এখন কাৰ্যালয় স্মাৰকত এই সমূহ কঠোৰ নিৰ্দেশনা দিয়া হৈছে ৷

মুখ্যমন্ত্ৰীয়ে কয় যে, কিছুমান ধৰ্মৰ মতে দ্বিতীয়‌ বিবাহত কোনো বাধা নাই ।‌ কিন্তু চৰকাৰী চাকৰিয়ালৰ‌ ক্ষেত্ৰত এই নিয়ম প্ৰযোজ্য নহয় । মুখ্যমন্ত্ৰীয়ে কয় যে এনেকুৱা দ্বিতীয় বিবাহ কৰা চৰকাৰী কৰ্মচাৰীজনৰ মৃত্যুৰ পিচত তেওঁৰ দুয়োগৰাকী পত্নীয়ে স্বামীৰ পেন্সনৰ বাবে দাবী কৰে । এইক্ষেত্ৰত চৰকাৰৰ বহুত অসুবিধা হয় ।‌ কোনো বিধবাই স্বামীৰ পেন্সনৰ পৰা বঞ্চিত হ’বলগীয়া হয় । সেইবাবে চৰকাৰে এই নিদৰ্শনা জাৰি‌ কৰিছে । তেওঁ উল্লেখ কৰে যে, ‘এয়া পুৰণি চৰকাৰী নিদেৰ্শনা । কংগ্ৰেছৰ‌ সময়তে কৰা‌ নিয়ম । কিন্তু ৰূপায়ণ‌ কৰা‌ হোৱা‌ নাছিল । এতিয়া আমি ৰূপায়ণ কৰিবলৈ আগবাঢ়িছো’ ।

লগতে পঢ়ক :Assam Second Marriage: চৰকাৰক সুধিহে চৰকাৰৰ কৰ্মচাৰীয়ে কৰিব পাৰিব দ্বিতীয় বিবাহ