গুৱাহাটী, 17 ছেপ্টেম্বৰ:আজিৰে পৰা 20 ছেপ্টেম্বৰ নিশা 12 বজালৈ অমৃত বৃক্ষ আন্দোলনৰ বিশেষ কার্যসূচী আৰম্ভ হৈছে । অমৃত বৃক্ষ আন্দোলনৰ জৰিয়তে 1 কোটি গছ পুলি ৰোপনেৰে অভিলেখ সৃষ্টিৰ লক্ষ্য ৰাজ্য চৰকাৰৰ । সেই উদ্দেশে দেওবাৰে পুৱা জনতা ভৱনত মুখ্যমন্ত্ৰীয়ে শুভাৰম্ভ কৰে ‘‘অমৃত বৃক্ষ আন্দোলন’’ৰ । পৰিৱেশ আৰু বন বিভাগৰ প্ৰচেষ্টাত অনুষ্ঠিত এই ‘‘অমৃত বৃক্ষ আন্দোলন’’ৰ কাৰ্যসূচীত উপস্থিত থাকে বিভাগীয় মন্ত্ৰী আৰু প্ৰশাসনীয় বিষয়াসকল ।
অমৃত বৃক্ষ আন্দোলনৰ শুভাৰম্ভ পিচতেই সংবাদমেল সম্বোধন কৰে মুখ্যমন্ত্ৰী হিমন্ত বিশ্ব শৰ্মাই । সংবাদমেল যোগে বহু কেইটাও পদক্ষেপৰ লোৱাৰ কথা ঘোষণা কৰে মুখ্যমন্ত্ৰী গৰাকীয়ে । সংবাদমেল সম্বোধন কৰি মুখ্যমন্ত্ৰী গৰাকীয়ে কয়, ‘‘আজি আমাৰ বাবে গৌৰৱৰ দিন । বৃক্ষ ৰোপনেৰে এটা বিশ্ব অভিলেখ কৰাৰ প্ৰচেষ্টা আজি আমি আৰম্ভ কৰিছোঁ । এই প্ৰচেষ্টা ইতিমধ্যে ৰাজ্যৰ বিভিন্ন অঞ্চলত আৰম্ভ হৈছে । এই প্ৰচেষ্টা যদিও আজি আমি চূড়ান্ত ৰূপ দিছোঁ তথাপিও, যোৱা ৯ ছেপ্টেম্বৰৰ পৰাই দৰাচলতে অমৃত বৃক্ষ অভিযান আৰম্ভ হৈছিল । আজি অমৃত বৃক্ষ আন্দোলন সমাপ্ত হৈছে । এই সময়চোৱাই আমি কেইটামান বিশ্ব অভিলেখ গঢ়াৰ সৃষ্টি কৰিছিলো । যাৰ জৰিয়তে সমগ্র বিশ্বতে বৃক্ষ ৰোপনৰ এক আন্দোলনৰ সৃষ্টি কৰাৰ প্ৰয়াস কৰিছো ।’’