BVFCL Namrup: নামৰূপ সাৰ কাৰখানা বন্ধৰ সিদ্ধান্তৰ বিৰোধিতা আছুৰ; তীব্ৰ গণতান্ত্ৰিক আন্দোলনৰ হুংকাৰ

নামৰূপ সাৰ কাৰখানা অসমবাসীৰ হৃদপিণ্ড। কোনো কাৰণতে সাৰ কাৰখানা বন্ধ হ'বলৈ দিয়া নহ'ব। তীব্র গণতান্ত্ৰিক আন্দোলন গঢ়ি তোলাৰ হুংকাৰ সদৌ অসম ছাত্ৰ সন্থাৰ।

গুৱাহাটী, 23 জুলাই :জাগীৰোডৰ কাগজ কলৰ দৰেই অতি শীঘ্ৰে বন্ধ হ'ব নামৰূপৰ সাৰ কাৰখানা ৷ লোকসভাত সাংসদ গৌৰৱ গগৈৰ এক প্ৰশ্নৰ উত্তৰত এই কথা নিশ্চিত কৰে কেন্দ্ৰীয় ৰাসায়ন আৰু সাৰ দপ্তৰৰ ৰাজ্যিক মন্ত্ৰী ভগৱন্ত খুবাই ৷ কেন্দ্ৰীয় ৰাসায়ন আৰু সাৰ দপ্তৰৰ ৰাজ্যিক মন্ত্ৰী ভগৱন্ত খুবাই দিয়া লিখিত উত্তৰৰ তথ্য মতে নামৰূপৰ সাৰ কাৰখানা বন্ধৰ সিদ্ধান্ত গ্ৰহণ কৰিছে চৰকাৰে ৷ চৰকাৰৰ এই তথ্যৰ পিচতেই এতিয়া হাহাকাৰময় পৰিবেশৰ সৃষ্টি হৈছে নামৰূপ সাৰ কাৰখানাৰ শ্ৰমিক-কৰ্মচাৰীৰ মাজত ৷

আনহাতে চৰকাৰৰ এই হঠকাৰী সিদ্ধান্তক তীব্ৰ বিৰোধিতা কৰিছে জাতীয় দল-সংগঠনসমূহে ৷ দেওবাৰে সাৰ কাৰখানা বন্ধ কৰাৰ চৰকাৰৰ যি সিদ্ধান্ত তাৰ বিৰোধিতা কৰি প্ৰতিক্ৰিয়া আগবঢ়াই সদৌ অসম ছাত্ৰ সন্থাৰ সাধাৰণ সম্পাদক শংকৰজ্যোতি বৰুৱাই ৷ শংকৰজ্যোতি বৰুৱাই মন্তব্য কৰি কয় যে কোনো কাৰণতে সাৰ কাৰখানা বন্ধ হ'বলৈ দিয়া নহ'ব ৷ নামৰূপ সাৰ কাৰখানা অসমবাসীৰ হৃদপিণ্ড | অসম তথা উত্তৰ-পূৰ্বাঞ্চলৰ কৃষি অৰ্থনীতি তথা কৃষক সকল নিৰ্ভৰ কৰে নামৰূপৰ সাৰ কাৰখানাৰ ওপৰত | নামৰূপস্থিত এই সাৰ কাৰখানাৰ পৰা উত্তৰ-পূৰ্বাঞ্চলত প্ৰয়োজনীয় 5 লাখ মেট্ৰিক'টন সাৰৰ 70 শতাংশ সাৰ যোগান ধৰি আহিছে ৷

তেওঁ আৰু কয়, ‘‘সাৰ কাৰখানাটোৰ ইতিমধ্যেই দুটা গোটৰ উৎপাদন বন্ধ হৈ গৈছে ৷ তৃতীয় গোটৰ উৎপাদন চলি আছে যদিও, সেই উৎপাদনৰ জৰিয়তে ৰাজ্যৰ সমগ্ৰ কৃষি অৰ্থনীতিৰ প্ৰয়োজনীয়তা পূৰণ কৰিব পৰা নাই ৷ এই সম্পৰ্কে আছুৱে বিভিন্ন সময়ত মন্তব্য প্ৰদান কৰি আহিছে ৷ কেইবছৰমান পূৰ্বে সাৰ কাৰখানাটোলৈ 5 হাজাৰ কোটি টকা প্ৰদান কৰাৰ কথাও চৰকাৰে ঘোষণা কৰিছিল ৷ কিন্তু চৰকাৰৰ সেই ঘোষণা এতিয়া অসাৰ প্ৰতিপন্ন হোৱাহে পৰিলক্ষিত হ’ল ৷

লগতে তেওঁ মন্তব্য কৰি কয়, "এই সাৰ কাৰখানাত বহু থলুৱা লোক কৰ্মৰত হৈ আছে ৷ শেহতীয়াকৈ ইয়াৰ দায়িত্ব বহিৰাগতক প্ৰদান কৰাৰ পাচত, সেই ব্যক্তিসকলে অনুষ্ঠানটোৰ উন্নতিৰ বিপৰীতে এই অনুষ্ঠানটো কেনেকৈ বন্ধ কৰি ইয়াৰ পৰা যাব লাগে সেই কথাতে নিমজ্জিত হৈ থাকিল ৷ চৰকাৰখনে যে অসমীবাসী ৰাইজৰ কথা নুশুনে সেই কথা চৰকাৰৰ এই সিদ্ধান্তৰ পিছত এতিয়া স্পষ্ট হৈ পৰিছে বুলি কয় ছাত্ৰ নেতাজনে ৷ কাৰ অভিসন্ধিত চৰকাৰে এই সিদ্ধান্ত গ্ৰহণ কৰিছে সেইটো এতিয়া লাখ টকীয়া প্ৰশ্ন বুলি মন্তব্য কৰে শংকৰজ্যোতি বৰুৱাই ৷ এই উদ্যোগটোৰ সৈতে অসমবাসীৰ আবেগ জড়িত হৈ আছে ৷ প্ৰধানমন্ত্ৰীক সৈমান কৰায় সাৰ কাৰখানাটো পুনৰ্জীৱিত কৰি তুলিবলৈ চৰকাৰক দাবী জনায় শংকৰজ্যোতি বৰুৱাই ৷

চৰকাৰে যদি এই দাবী মানি নলয় তেন্তে তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰে সাধাৰণ সম্পাদকগৰাকীয়ে ৷ ইতিমধ্যে দেওবাৰে ডিব্ৰুগড় জিলা ছাত্ৰ সন্থাৰ তৰফৰ পৰা আন্দোলনৰ কাৰ্যসূচী গ্ৰহণ কৰা হৈছে বুলি জানিবলৈ দিয়ে তেওঁ ৷ লগতে 25 জুলাইত গণ বিক্ষোভৰ কাৰ্যসূচী গ্ৰহণ কৰিছে ডিব্ৰুগড় জিলা ছাত্ৰ সন্থাই ৷

লগতে পঢ়ক :Protest in Namrup: নামৰূপ সাৰ কাৰখানাৰ ইউনিয়নক আমন্ত্ৰণ সৰ্বানন্দ সোণোৱালৰ