গুৱাহাটী, 8মাৰ্চঃ১৯৭৯ চনৰ পৰা ১৯৮৫ চনলৈ চলা বিশ্বৰ সৰ্বাধিক চৰ্চিত ছাত্ৰ আন্দোলনে সৃষ্টি কৰা ৰাজনৈতিক নেতা সকল এতিয়া ইতিহাস হোৱাৰ পথত ৷ অন্ততঃ সমাগত বিধান সভাৰ নিৰ্বাচনত প্ৰাৰ্থীত্ব পোৱা নোপোৱাক লৈ চলা ঘটনা পৰিঘটনাই এই কথা স্পষ্ট কৰি তুলিছে ।
ইতিহাস হোৱাৰ পথত ৮৫ৰ ৰাজনীতিক আজিৰে পৰা তিনিটা দশকৰ আগতে অসমৰ ৰাইজে যি সকল ৰাজনীতিকক ফুল-চন্দনেৰে পূজা কৰিছিল, ৰাস্তাই ঘাটে স্বতঃস্ফূৰ্তভাৱে গামোচা, ফুলৰ মালাৰে ওপচাই দিছিল, সেই সকলৰ বাবে আজি যেন কতোৱেই ঠাই নাই । তেওঁ লোক আজি ইতিহাস । আহ ঐ আহ্ ওলাই আহ' বুলি দিয়া আহ্বানত হাজাৰ হাজাৰ মানুহ ওলাই অহাৰ পৰিৱেশৰ কথা দূৰতেই, নিজৰ ঘৰতেই তেওঁ লোক আজি গুৰুত্বহীন, উপেক্ষিত । থিক 'একালৰ বৃন্দাবন একালত পৰে চন' দৰে । শেহতীয়াকৈ অসম গণ পৰিষদৰ অন্যতম প্ৰতিষ্ঠাপক তথা ৰাজ্যৰ দুবাৰৰ মুখ্যমন্ত্ৰী প্ৰফুল্ল কুমাৰ মহন্তই নিজৰ সমষ্টিটোকেই ধৰি ৰাখিব নোৱাৰি হায়ৈ বিয়ৈ কৰিবলগীয়া হোৱা পৰিস্থিতিয়ে এনে কথাকে স্পষ্ট কৰিছে । বহু চেষ্টা কৰিও একালৰ এই মহাপ্ৰতাপী নেতা গৰাকীয়ে এইবাৰ যোৱা তিনিটা দশকে একেৰাহে বিজয় সাব্যস্ত কৰি অহা বঢ়মপুৰ সমষ্টিটো হেৰুৱাবলগীয়া হ'ল । দলৰ সভাপতি হ'লেও ৰাজনীতিত কণিষ্ঠ অতুল বৰাই মহন্তৰ সমষ্টিটো ৰখাৰ বাবে কোনো চেষ্টা নকৰিলে । বৰং হেলাৰঙে এৰি দি সন্তোষ্ট কৰিলে বিজেপিক ।
কেৱল প্ৰফুল্ল কুমাৰ মহন্ত ই নহয়, নিৰ্বাচনী চনৰ কথা বাদেই, প্ৰাৰ্থীত্বৰ দৌৰতেই ৰণত পৰিল ৮৫ ৰ ৰণুৱা ঘোঁৰা । লক্ষনীয়ভাৱে অগপ আৰু বিজেপিৰ ৰাজনৈতিক মিত্ৰতাৰ নামত এইবাৰ সমষ্টি হেৰুৱাবলগীয়া হ'ল বৃন্দাবন গোস্বামী, উৎপল দত্তৰ দৰে অসম আন্দোলনৰ নেতাই । এওঁলোকে সমষ্টি হেৰুৱাবলগীয়া হ'ল নিজ হাতে গঢ়া দল অসম গণ পৰিষদৰ মজিয়াত থাকিও । আনহাতে, ক্ষমতা অব্যাহত ৰখাৰ স্বাৰ্থত ইতিমধ্যেই বিজেপিৰ শৰণাগত হোৱা অতুল বৰাইও এইবাৰ দিছপুৰ সমষ্টিৰ পৰা নিৰ্বাচন বিজেপিৰ হৈ খেলিবলৈ পোৱাৰ আশা অতি ক্ষীণ । দলে এই পৰ্যন্ত ঘোষণা কৰা নাই যদিও বৰাৰ সলনি এইবাৰ দিছপুৰ ত নতুন মুখেহে আত্মপ্ৰকাশ কৰিব । আনহাতে, এই বাৰৰ নিৰ্বাচনী প্ৰেক্ষাপটত কোনো উমঘামেই নাই ভৰত নৰহৰ দৰে একালৰ প্ৰতাপী নেতাৰ । কংগ্ৰেছৰ সভাপতি ৰিপুন বৰাই তেওঁক এনেকৈ এঘৰীয়া কৰিলে যে তেওঁ প্ৰতিদ্বন্দিতা কৰাৰ বাবে টিকট বিচাৰিবলৈ সাহসেই নকৰিলে । আনকি এইবাৰ মৌন হৈ ৰ’ল পত্নী ৰাণী নৰহো । কেৱল সেয়ে নহয়, এইবাৰৰ ৰাজনৈতিক প্ৰেক্ষাপটত অতি মৌন হৈ আছে নগাঁৱৰ গিৰিণ বৰুৱা, কলিয়াবৰ ৰ গুণীন হাজৰিকাৰ দৰে একালৰ জনপ্ৰিয় ৰাজনীতিক । বৰক্ষেত্ৰীত অসম জাতীয় পৰিষদে অসম বিধানসভাৰ প্ৰাক্তন অধ্যক্ষ পুলকেশ বৰুৱাক প্ৰাৰ্থীত্ব দিছে যদিও তাক মানি লোৱা নাই মিত্ৰ দল ৰাইজৰ দলে ।
গতিকে সেই দিশৰ পৰা পুলকেশ বৰুৱাও এই মূহুৰ্তত অস্তিত্বৰ সংকটত । একে দৰে পাটাছাৰকুছি সমষ্টিত বিজেপিৰ খোদ সভাপতি গৰাকীয়েই প্ৰতিদ্বন্দিতা কৰাত স্বাভাৱিকতে সংকটৰ সন্মুখীন হৈছে ১৯৮৫ চনৰ নিৰ্বাচনত ৰেকৰ্ড সংখ্যক সমষ্টিটোৰ পৰা জিকিৰ অহা বিধায়ক পবীন্দ্ৰ ডেকা । মনকৰিবলগীয়া মে অসম আন্দোলনৰ মাধ্যমৰে ১৯৮৫ চনত ৰাজনীতিৰ পথাৰত পদাৰ্পন কৰা কেইবাগৰাকীও নেতা আজি এই সংসাৰত নাই । তাৰ ভিতৰত ভৃগু কুমাৰ ফুকন, নগেন শৰ্মা, ললিত ৰাজখোৱা, দীলিপ শইকীয়া সোনোৱাল আদি প্ৰধান । কিন্তু যিসকল জীয়াই আছে আৰু ৰাজনীতিতেই আছে তেওঁলোকো আজি ইতিহাস হোৱাৰ পথত । অসমৰ পৰিৱৰ্তিত ৰাজনৈতিক পৰিস্থিতিত নিসন্দেহেই এক লক্ষণীয় বিষয় ।
লগতে পঢ়কঃঅখিল গগৈ নতুন অসমৰ স্বপ্ন !
