যোৰহাট,20 মাৰ্চঃ বৃহস্পতিবাৰৰ নিশা কৰ্তব্যৰ পৰা ঘৰলৈ উভটি অহাৰ সময়ত যোৰহাটৰ সঞ্জীৱনী নাৰ্চিংহোমৰ সন্মুখত মটৰ চাইকেলত অহা দুজন যুৱক পৰি থকা দেখা পাই উদ্ধাৰ কৰিবলৈ গৈ শাৰীৰিকভাৱে অপদস্থ হয় জ্যেষ্ঠ সাংবাদিক তথা যোৰহাট প্ৰেছ ক্লাবৰ প্ৰাক্তন সভাপতি নিৰঞ্জন মহন্ত । আমাৰ অসম কাকতৰ লগত জড়িত সাংবাদিক গৰাকীক শাৰীৰিকভাৱে আক্ৰমণ কৰা ঘটনাই চাঞ্চল্যৰ সৃষ্টি কৰিছে সমগ্র চহৰখনত ৷
উল্লেখ্য যে, মহন্তই মানৱতাৰ খাতিৰত উদ্ধাৰ কৰিবলৈ যোৱা সময়ত সুৰাপায়ী যুৱকদ্বয়ে উভটি ধৰে সাংবাদিক গৰাকীক ৷ সাংবাদিকগৰাকীৰ দোষৰ বাবে দুৰ্ঘটনা সংঘটিত হোৱা বুলি চিঞৰ-বাখৰ কৰে যুৱকদ্বয়ে ৷ লগতে চহৰখনত মাজমজিয়াত অৱস্থিত বিষ্ণুৰাম বৰুৱা হলৰ সন্মুখত আগভেটি ধৰি ধন দাবী কৰে । দাবী কৰা ধন দিবলৈ অমান্তি হোৱা সাংবাদিক গৰাকীক শাৰীৰিকভাৱে প্ৰহাৰ কৰে অচিনাক্ত যুৱক দুজনে । ফলত মুখমণ্ডলত আঘাত পায় সাংবাদিক গৰাকীয়ে । ইতিমধ্যে ঘটনা সন্দৰ্ভত নিৰঞ্জন মহন্তই আৰক্ষী থানাত এজাহাৰ দাখিল কৰিছে । সাংবাদিক নিগ্ৰহৰ উক্ত ঘটনাই প্ৰতিক্ৰিয়া সৃষ্টি কৰিছে সচেতন নাগৰিকসকলৰ মাজত ৷ শীঘ্ৰে দুৰ্বৃত্তক গ্ৰেপ্তাৰ কৰিবলৈ আৰক্ষীক দাবী জনাইছে স্থানীয় দল-সংগঠনৰ লগতে সচেতন মহলে ৷ যোৰহাটৰ শংকৰ বুক ষ্টলৰ সমীপত সাংবাদিক গৰাকীক আক্ৰমণ কৰিছিল দুৰ্বৃত্তই ৷ ঘটনা সন্দৰ্ভত আৰক্ষীয়ে এজনক আটক কৰিবলৈ সক্ষম হৈছে । আৰক্ষীয়ে আটক কৰা লোকজন চৰাইবাহী হাবুঙীয়া গাঁৱৰ দিলীপ গগৈ বুলি জানিব পৰা গৈছে ৷ ঘটনাত জড়িত আনজন যুৱক বৰ্তমান পলাতক অৱস্থাত আছে ।
লগতে চাওকঃকৰ'ণা আতংকঃ কাইলৈৰ পৰা দৰ্শনাৰ্থীৰ বাবে বন্ধ কামাখ্যা মন্দিৰ