হোজাইত 12 বছৰীয়া কিশোৰক অপহৰণৰ চেষ্টা

ৰঙা মাৰুতি গাড়ীৰে আহিছিল তিনিজন অপহৰণকাৰী ৷

হোজাই, 20 অক্টোবৰ: মধ্য অসমত দিনক দিনে বৃদ্ধি পাইছে অপৰাধমূলক কাৰ্যকলাপ ৷ শনিবাৰ হোজাই চহৰত এজন 12 বছৰীয়া কিশোৰক অচিনাক্ত দুৰ্বৃত্বই অপহৰণৰ চেষ্টা কৰাক কেন্দ্ৰ কৰি সৃষ্টি হয় ব্যাপক চাঞ্চল্যৰ ৷ এই ঘটনা সংঘটিত হৈছে চহৰখনৰ নখুটিৰ ১নং খাগৰিজানত ৷ ঘটনা অনুসৰি অঞ্চলটোৰ নিবাসী আমিনুল হক নামৰ এজন ব্যক্তিৰ 12 বছৰীয়া পুত্ৰ ছোৱেল আহমেদ নামৰ কিশোৰজনক শনিবাৰে খেলি থকা অৱস্থাত এখন ৰঙা মাৰুতিৰে অহা তিনি দুৰ্বিত্তই গাড়ীত ভৰাই অপহৰণৰ চেষ্টা কৰে ৷ অৱশ্যে কিশোৰজনক লৈ গাড়ীখন কিছুদুৰ যোৱাৰ পাছতে কিশোৰজনে ভাগ্যক্ৰমে গাড়ীখনৰ পৰা পলাই যাবলৈ সক্ষম হয় ৷ ইফালে পলাই অহাৰ পথত কিশোৰজন কিছু পৰিমাণে আঘাতপ্ৰাপ্ত হয় ৷ ঘটনা সন্দৰ্ভত ছোৱেল আহমেদৰ পৰিয়ালৰ লোকে নখুতি থানাত এক এজাহাৰ দাখিল কৰিছে যদিও আৰক্ষীয়ে এইপৰ্যন্ত ঘটনাৰে জড়িত এজনো অভিযুক্তক গ্ৰেপ্তাৰ কৰিবলৈ সক্ষম হোৱা নাই ৷