হোজাই, 17 জুলাই :বিগত 24 ঘণ্টাত ৰাজ্যত কৰ’ণা ভাইৰাছত আক্ৰান্ত হৈছে 1,782 গৰাকী লোক। এই সময়চোৱাত 1,27,490 টা ক’ভিড পৰীক্ষা সম্পন্ন কৰা হয় । ক’ভিড পজিটিভিটিৰ হাৰ 1.40% হোৱাৰ বিপৰীতে বৰ্তমানলৈ সুস্থ হৈ উঠিছে 95.49% শতাংশ লোক ৷ ৰাজ্য চৰকাৰে বিভিন্ন ধৰণৰ আংশিক লক ডাউন, সান্ধ্য আইন আদি জাৰি কৰাৰ সময়তে কোনো কোনো ঠাইত এই ক’ভিড নীতিক বুঢ়া আঙুলি দেখুওৱা পৰিলক্ষিত হৈছে ৷
লংকাৰ স্বাস্থ্যকেন্দ্ৰত ধোঁৱাচাঙত উঠিছে ক'ভিড প্ৰ'টক'ল । প্ৰতিষেধক ল’বলৈ যোৱা লোকৰ মুখত নাই মাস্ক । নাই সামাজিক দুৰত্ব । আনকি কৰ্তব্যৰত আৰক্ষীৰো এই বিষয়ৰ প্ৰতি নাই কোনো ভ্ৰুক্ষেপ ।
লংকাত ধোঁৱাচাঙত ক'ভিড প্ৰ'টক'ল একাংশৰ এই অবৰ্ণনীয় কাৰ্যৰ পিছতে হোজাইত গণ সংক্ৰমণৰ আশংকা কৰিছে চিকিৎসকে । ক'ভিড পৰিস্থিতি নিয়ন্ত্ৰণৰ বাবে কঠোৰ পদক্ষেপ গ্ৰহণ কৰাৰ সমান্তৰালকৈ এনে বিধিক যেন এতিয়াও একাংশ লোকে চূড়ান্তভাৱে উলংঘা কৰি আহিছে । লংকাত দেখা গ’ল এনে এক দৃশ্য ।
হোজাই জিলাৰ লংকাৰ কাকী প্ৰাথমিক স্বাস্থ্যকেন্দ্ৰত ক'ভিড প্ৰতিষেধক প্ৰদানৰ নামত এনে ভয়ংকৰ পৰিস্থিতি সৃষ্টি হোৱা দেখা গ’ল । স্বাস্থ্যকেন্দ্ৰটোত প্ৰতিষেধক ল’বলৈ অহা লোকসকলৰ মাজত নাই কোনো সামাজিক দুৰত্ব, নাই মুখত মাস্ক । প্ৰতিজন লোকে কেৱল নিজৰ নাম অন্তৰ্ভুক্ত কৰাক লৈ ব্যস্ত হৈ পৰা দেখা যায় ৷
ইপিনে এই বিষয়ৰ প্ৰতি কৰ্তব্যৰত আৰক্ষীৰো নাই কোনো ভ্ৰুক্ষেপ । এনে পৰিস্থিতিত গণ সংক্ৰমণ হোৱাৰ পূৰ্ণ সম্ভাৱনা আছে বুলি ব্যক্ত কৰিছে খোদ চিকিৎসালয়খনত কৰ্তব্যৰত চিকিৎসকগৰাকীয়ে । প্ৰশ্ন উঠিছে কেতিয়া সজাগ-সচেতন হ’ব জনসাধাৰণ ? চৰকাৰে বান্ধি দিয়া নীতি-নিয়মসমূহক গুৰুত্ব দিবনে চৰকাৰে ?
পৰিতাপৰ বিষয় যে ইমানৰ পিছতো গাত কথা লগা নাই লংকাবাসীৰ ৷ লংকাৰ ভয়াৱহ পৰিস্থিতি দেখি শংকিত হৈ পৰিছে সচেতন মহল ৷ ক’ভিড বিধি উলংঘা কৰাৰ বাবে এতিয়া গণ সংক্ৰমণৰ আশংকা কৰা হৈছে ৷
লগতে পঢ়ক:দুপালি ভেকচিনৰ পাচতো ৰে'লৱে ষ্টেচন আৰু বিমানবন্দৰত COVID TEST বাধ্যতামূলক
