গোলাঘাট , ১৬ মাৰ্চ :শতিকাৰ সৰ্ববৃহৎ চুলাই ট্ৰেজেডীৰ ঘটনাৰ পাচতেই গোলাঘাটত এতিয়া দিনে নিশাই চলিছে চুলাই মদ বিৰোধী অভিযান । শুকুৰবাৰে নিশা বেতিয়নীৰ নৰাগাঁও, কাকতি গাঁৱত ৰাইজে চলালে চুলাই মদ বিক্ৰী কৰা আৰু প্ৰস্তুত কৰা ব্যক্তিৰ বিৰুদ্ধে অভিযান ।
চুলাই মদৰ বিৰুদ্ধে অভিযান চলাবলৈ এতিয়া ওলাই আহিছে গোলাঘাটৰ পুৰুষ মহিলাকে ধৰি সকলো ডেকা গাভৰু । স্থানীয় ৰাইজে আৱকাৰী আৰু আৰক্ষী দলৰ সহযোগত চলালে এই অভিযান। মদ প্ৰস্তুত কৰা আৰু বিক্ৰী কৰা মানুহৰ বাস গৃহত , গৰু গোহালি , ছাগলীৰ গড়ালকে ধৰি ঘৰৰ পাচফালৰ বাৰীটো চলিল এই অভিযান। অভিযান কালত মদ বিক্ৰী কৰি থকা পোনা দাস নামৰ এজন প্ৰায় ৭৫ বছৰীয়া বৃদ্ধ আৰু বীনা ভূঞা নামৰ এগৰাকী মহিলাক আটক কৰা হয় । আটকাধীন লোক কেইজনৰ ঘৰৰ পৰা চুলাই মদ প্ৰস্তুত কৰা সঁজুলি, চুলাই মদ আৰু স্পীৰিত জব্দ কৰে আৰক্ষীয়ে । ইয়াৰোপৰি আৰক্ষীয়ে জব্দকৃত সামগ্ৰী সমূহ নষ্ট কৰি দিয়ে ।