গোলাঘাট , 27 মে': গোলাঘাটৰ এগৰাকী ছাত্ৰীয়ে মেধাৰ পৰিচয় দিবলৈ সক্ষম হোৱাৰ পিচতো মাতৃৰ মুখত হাঁহি নাই ৷ আৰ্থিক দীনতা আৰু ঘৰুৱা সমস্যাই মেধাৰ পৰিচয় দিয়াত যে হেঙাৰ হ’ব নোৱাৰে তাকেই পুনৰ প্ৰমাণ কৰি দেখুৱালে গোলাঘাটৰ সীমা গগৈয়ে ৷ ফলাফল ঘোষণাৰ প্ৰায় দহ দিনৰ পূৰ্বে অকালতে চিৰ বিদায় লৈছিল ছাত্ৰী গৰাকীৰ পিতৃয়ে ৷
গোলাঘাটৰ বিশ্বেশ্বৰ ফুকন কনিষ্ঠ মহাবিদ্যালয়ৰ ছাত্ৰী সীমা গগৈয়ে সদ্য ঘোষিত উচ্চতৰ মাধ্যমিকৰ ফলাফলত আটাইকেইটা বিষয়ত লেটাৰ নম্বৰসহ শতকৰা 90 শতাংশ নম্বৰ লাভ কৰি উত্তীৰ্ণ হয় ৷ পৰীক্ষাৰ সময়ত সীমাৰ পিতৃ কৰ্কট ৰোগত আক্ৰান্ত হৈ শয্যাগত অৱস্থাত আছিল ৷ তেনে পৰিৱেশতেই পৰীক্ষাত অৱতীৰ্ণ হৈছিল গোলাঘাট আমোলাপট্টিৰ এই গৰাকী ছাত্ৰী ৷ কিন্তু দুখৰ বিষয় কন্যাৰ ভাল ফলাফল শুনিবলৈ নাপালে ৰোগাগ্ৰস্ত পিতৃয়ে ৷ জানিব পৰা মতে এখন সৰু দোকান দি পৰিয়াল পোহপাল দি আহিছিল সীমাৰ দেউতাক প্ৰবীণ গগৈয়ে ৷ তেওঁৰ মৃত্যুৰ পিচত কেৱল চাৰিওফালে আন্ধাৰ দেখিছে সীমা গগৈৰ মাতৃয়ে ৷ ভৱিষ্যতে এগৰাকী প্ৰশাসনিক বিষয়া হোৱাৰ লক্ষ্য ৰখা সীমাই আৰ্থিক দীনতাৰ বাবে লক্ষ্যত উপনীত হ'ব পাৰিবনে, সেই কথা এতিয়া সীমাৰ মাতৃৰ আগত এক প্ৰশ্ন হৈ পৰিছে ৷ সেয়ে কোনো সহৃদয় ব্যক্তিৰ সহায়ৰ আহবান জনায় সীমাৰ পৰিয়ালে ৷