কলিয়াবৰ আৰক্ষীৰ জালত চোৰাং চিকাৰী

কলিয়াবৰ আৰক্ষীৰ জালত দুৰ্ধৰ্ষ চোৰাং চিকাৰী আখতাৰ আলি । আখতাৰ আলিৰ স্বীকাৰোক্তিৰ ভিত্তিতে গ্ৰেপ্তাৰ আন এটা চিকাৰী আচমত আলি ।

কলিয়াবৰ, ৭ জুন :২০১৮ বৰ্ষৰ ১৫ ডিচেম্বৰত কাজিৰঙাৰ বাগৰি ৰেঞ্জৰ সমীপতে সংঘটিত গঁড় হত্যা ঘটনাই এতিয়া নিদ্ৰা হৰিছে কাজিৰঙা বন বিভাগৰ। কিয়নো এইটো গঁড় হত্যাৰ প্ৰতিবেদন দাখিল কৰিব লাগে ভাৰত চৰকাৰক। বাগৰি ৰেঞ্জৰ পৰ্যটক প্ৰৱেশৰ মূল পথত ১৫ ডিচেম্বৰৰ পুৱা পৰ্যটকে প্ৰত্যক্ষ কৰিছিল খৰ্গবিহীন গঁড়টোৰ মৃতদেহ। গঁড় হত্যাৰ প্ৰতিবেদন দাখিল কৰিবলৈ গৈ কাজিৰঙা বন বিভাগে ৰচনা কৰা নাটকৰ বিস্ফোৰক তথ্য এইবাৰ ফাদিল কৰিলে কলিয়াবৰ আৰক্ষীয়ে। আখতাৰ আলিক বন বিভাগে জখলাবন্ধা আৰক্ষীৰ সহযোগত ৮ মে তাৰিখে আটক কৰি বাগৰি ৰেঞ্জৰ লক আপত বন্দী কৰি থোৱাৰ সময়তে ১৩ মে'ত চোৰাং চিকাৰীটোৱে বন বিভাগৰ জিন্মাৰ পৰা পলায়ন কৰিছিল। ইয়াৰ পাছতে ৪ জুনৰ নিশা কলিয়াবৰ মহকুমা আৰক্ষী বিষয়া মৃন্ময় দাসৰ নেতৃত্বত আৰক্ষীৰ এটি দলে চামগুৰি থানা এলেকাৰ পৰা আটক কৰে আখতাৰ আলিক।

আখতাৰ আলিৰ তথ্যৰ ভিত্তিতে ১৫ ডিচেম্বৰৰ গঁড় হত্যাৰ গোচৰত কাজিৰঙা বন বিভাগে গ্ৰেপ্তাৰ কৰি ন্যায়িক জিন্মালৈ প্ৰেৰণ কৰা চোৰাং চিকাৰী, ছাহিদুল, আন্নাৰ আৰু জিয়াৰুলে আৰক্ষীক দিয়া স্বীকাৰোক্তিত পোহৰলৈ আহিছে কাজিৰঙাৰ বাগৰি ৰেঞ্জ এলেকাৰ দেওপানী আৰু দুখু কেম্পৰ মাজত বান্দৰ খালত দুমাহ পূৰ্বে আন এটা গঁড় হত্যা সংঘটিত হোৱা ঘটনা। ছাহিদুল, আন্নাৰ, জিয়াৰুল আৰু আখতাৰৰ সৈতে ১১জনীয়া চোৰাং চিকাৰীৰ দলে গঁড় টো হত্যা কৰি খৰ্গ লৈ উধাও হোৱাৰ কথা স্বীকাৰ কৰিছে।

উল্লেখ্য যে, কাজিৰঙা ৰাষ্ট্ৰীয় উদ্যানৰ গঁড় হত্যাত জড়িত দুৰ্ধৰ্ষ চোৰাং চিকাৰী আখতাৰ আলিৰ স্বীকাৰোক্তিৰ ভিত্তিত গ্ৰেপ্তাৰ কৰা হৈছে আন এটা চিকাৰী আচমত আলিক । কলিয়াবৰ আৰক্ষী আৰু কাজিৰঙা ৰাষ্ট্ৰীয় উদ্যান কৰ্তৃপক্ষই যুটীয়া অভিযান চলাই আচমত আলিক গ্ৰেপ্তাৰ কৰে ।