গোলাঘাটত ৩৭ নং ৰাষ্ট্ৰীয় ঘাইপথৰ দুৰৱস্থা...বিপদত ৰাইজ

গোলাঘাটত ৰাষ্ট্ৰীয় ঘাইপথত পুখুৰীসদৃশ গাঁত ৷ বিধস্তপথেৰে বিপদসংকুল যাতায়ত অব্যাহত ৰাইজৰ ৷ যি কোনো মুহূৰ্তত ভয়াৱহ দুৰ্ঘটনা সংঘটিত হোৱাৰ সম্ভাৱনা ৷

গোলাঘাট, 4 এপ্ৰিলঃ গোলাঘাট নুমলীগড়ৰ 37নং ৰাষ্ট্ৰীয় ঘাইপথৰ বিধ্বস্ত ৰূপত জ্বলাকলা পথচাৰীৰ ৷ 37নং ৰাষ্ট্ৰীয় ঘাইপথৰ দুৰৱস্থাৰ মাজেৰেই দৈনিক শ শ যান বাহনৰ অব্যাহত আছে বিপদ সংকুল যাতায়ত ৷ ৰাষ্ট্ৰীয় ঘাইপথত সৃষ্টি হৈছে পুখুৰীসদৃশ গাঁতৰ ৷ যাৰ ফলতে যি কোনো মুহূৰ্ততে পথচোৱাত ভয়াৱহ দুৰ্ঘটনা সংঘটিত হোৱাৰ আশংকা প্ৰকট হৈ পৰিছে ৷ যিহেতু গোলাঘাটৰ মাজেৰে নুমলীগড়ৰ পৰা দেৰগাঁৱলৈ নিৰ্মাণ হৈ থকা চাৰিলেনযুক্ত 37নং ৰাষ্ট্ৰীয় ঘাইপথৰ নিৰ্মাণকাৰ্য অতি লেহেমীয়া গতিত হোৱাৰ বাবে এতিয়া পথচাৰী, যানবাহনৰ চালক-যাত্ৰী, ৰোগী-প্ৰসূতিয়ে দীর্ঘদিনধৰি জ্বলাকলা খাই আহিছে ।

দৈনিক পথচোৱাত সংঘটিত হৈছে সৰু বৰ পথ দুৰ্ঘটনাও। যদিও উজনি-নামনি সংযোগী এই পথচোৱাৰ মেৰামতিৰ ক্ষেত্ৰত কাণসাৰ নাই চৰকাৰৰ কিম্বা প্ৰশাসনৰ ৷ ইফালে এজাক বৰষুণতে পানীত বুৰ যায় পথটো আৰু বন্ধ হৈ পৰে যাতায়ত। ফলত চৰকাৰী অমনোযোগিতাৰ বাবে হাৰাশাস্তি ভোগ কৰি আহিছে ৰাইজে ৷