লাভলীনা বৰগোঁহাইক সম্বৰ্ধনা ভাৰতীয় জীৱন বীমা নিগমৰ

ভাৰতীয় জীৱন বীমা নিগমৰ ৬৫ বছৰীয়া যাত্ৰা উপলক্ষ্যে ইঞ্চুৰেঞ্চ সপ্তাহ পালন কৰা হৈছে । এই বিশেষ মুহূৰ্তত ভাৰতীয় জীৱন বীমা নিগমে সম্বৰ্ধনা জ্ঞাপন কৰিছে বক্সাৰ লাভলীনা বৰগোঁহাইক । বীমা নিগমে অনুদানো আগবঢ়াইছে লাভলীনাক ।

সৰুপথাৰ,২ ছেপ্তেম্বৰ :৬৫ বছৰত ভৰি দিলে ভাৰতীয় জীৱন বীমা নিগমে (LIC) । এই শুভক্ষণত দেশজুৰি ভাৰতীয় জীৱন বীমা নিগমে বিভিন্ন ধৰণৰ কাৰ্যসূচী ৰূপায়ণ কৰিছে । অসমৰ যোৰহাট সংমণ্ডলৰ উদ্যোগতো বিশেষ কাৰ্যসূচী ৰূপায়ণ কৰা হৈছে ।

শেহতীয়াকৈ টকিঅ' অলিম্পিকত (Tokyo Olympics) পদক অৰ্জন কৰা গোলাঘাটৰ জীয়ৰী বক্সাৰ লাভলীনা বৰগোঁহাইক সম্বৰ্ধনা জনাই এলআইচিৰ যোৰহাট সংমণ্ডলে । বক্সাৰ গৰাকীৰগোলাঘাট জিলাৰ বৰপথাৰস্থিত বাৰমুখীয়াৰ বাসগৃহত এই সম্বৰ্ধনা অনুষ্ঠানৰ আয়োজন কৰা হয় । এলআইচিৰ ৬৫ সংখ্যাক ইঞ্চুৰেঞ্চ সপ্তাহ উপলক্ষ্যে খেলুৱৈ গৰাকীক আৰু তেওঁৰ পিতৃক সম্বৰ্ধনা জ্ঞাপন কৰাৰ লগতে লাভলীনালৈ ২৫ লাখ টকাৰ পুৰস্কাৰ আগবঢ়ায় ।

এই কাৰ্যসূচীত জীৱন বীমা নিগমৰ যোৰহাট সংমণ্ডলৰ জ্যেষ্ঠ প্ৰবন্ধক প্ৰকাশ মিশ্ৰা, সৰুপথাৰৰ শাখা প্ৰবন্ধক পংকজ হাজৰিকা, গোলাঘাটৰ শাখা প্ৰবন্ধক তৰুণ বৰাকে ধৰি বহু কেইগৰাকী বিশিষ্ট ব্যক্তি উপস্থিত থাকে ।

লগতে পঢ়ক :কংগ্ৰেছ শূন্য হোৱাৰ দিশে শোণিতপুৰ জিলা !