খুমটাই, 5 জুনঃ খুমটাইত দুই যুৱকৰ বিৰুদ্ধে ধন আত্মসাতৰ অভিযোগ ৷ গৰিয়াজানৰ সুনীল সিং আৰু গোলাঘাটৰ পাৰ্থপ্ৰতিম বৰা নামৰ দুই যুৱকে দেৰগাওঁ এলাহাবাদ বেংকৰ কৰ্মচাৰী বুলি চিনাকি দি ভুৱা বেংক একাউণ্ট খুলি কেইবা লাখ টকা আত্মসাত কৰাৰ অভিযোগ তুলিছে স্থানীয় ৰাইজে ৷ দেৰগাওঁ এলাহাবাদ বেংকৰ মেনেজাৰ বুলি চিনাকি দি বিগত কিছুদিনৰ পৰা খুমটাই, শাওতলি, বাদুলিপাৰ,গৰিয়াজান অঞ্চলৰ সাধাৰণ ৰাইজৰ পৰা ১১শ টকাকৈ সংগ্ৰহ কৰি আহিছিল এই দুষ্ট চক্ৰটোৱে ৷
মঙলবাৰে এই চক্ৰটোৱে গৰিয়াজানৰ সুনীল সিঙৰ ঘৰত ধন সংগ্ৰহ কৰি থাকোতেই স্থানীয় লোকে এলাহাবাদ বেংকত যোগাযোগ কৰি এই ঘটনাটোৰ বিষয়ে বেংক মেনেজাৰক অৱগত কৰে । বেংকৰ মেনেজাৰে এই কামত জড়িত যুৱক কেইজন বেংকৰ কৰ্মচাৰী নহয় বুলি জানিবলৈ দিয়ে । এই ঘটনাৰ বিষয়ে ভুক্তভোগী লোক সকলৰ মাজত বিয়পি পৰাৰ লগে লাগে পাৰ্থপ্ৰতিম বৰা নামৰ প্ৰৱঞ্চকটো উক্ত স্থানৰ পলাই যাবলৈ সক্ষম হয় ৷ স্থানীয় ৰাইজে সুনীল সিঙক আবদ্ধ কৰি এক হুলস্থুলীয়া পৰিবেশৰ সৃষ্টি কৰে আৰু স্থানীয় আৰক্ষী উপস্থিত হৈ সুনীল সিঙক কৰায়ত্ত কৰিবলৈ সক্ষম হয় ৷ ইতিমধ্যে সমগ্ৰ ঘটনা সন্দৰ্ভত স্থানীয় আৰক্ষীয়ে অব্যাহত ৰাখিছে তদন্ত ৷
লগতে পঢ়কঃ বছৰি এক শতাংশকৈ কিয় হ্ৰাস পাইছে বন্যহস্তীৰ সংখ্যা ?