গোলাঘাট,২০ জুলাই:সোমবাৰৰ পৰা পৰা পুনৰ ব্যস্ত হৈ পৰিল গোলাঘাট নগৰ । লগে লগে আৰম্ভ হ'ল গতানুগতিক জন জীৱন। ইয়াৰ মাজতে বহুতে চৰকাৰে নিৰ্ধাৰণ কৰি দিয়া নীতি নিৰ্দেশনা সমূহ নমনাকৈ ওলাই আহিল নগৰলৈ । হেলমেট পিছৰেই কথা,মাস্কখন পিন্ধিবলৈকো এৰিলে একাংশ চালক আৰোহীয়ে। সোমবাৰে এই সকল আইন অমান্যকাৰী চালক আৰোহীক নাকি লগাবলৈ ৰাজপথত নামিল গোলাঘাটৰ যান বাহন নিয়ন্ত্ৰণ শাখাৰ আৰক্ষী ।
সমান্তৰালকৈ প্ৰশাসনে বান্ধি দিয়া নিৰ্দেশাৱলী পৌৰ এলেকাৰ ব্যৱসায়িক প্ৰতিষ্ঠান সমূহে কেনে ধৰণে পালন কৰিছে সেয়া পৰ্যবেক্ষণৰ বাবে নগৰখনত চোকা দৃষ্টি ৰাখিলে দণ্ডাধীশ,পৌৰ কাৰ্যবাহী বিষয়াকে ধৰি প্ৰশাসনৰ লোকসকলে ।
উল্লেখ্য যে,গোলাঘাট প্ৰশাসনে গোলাঘাট পৌৰ এলেকাত ঘোষণা কৰা লক ডাউন সোমবাৰৰ পৰা শিথিল কৰি ABC প্ৰক্ৰিয়াৰে গোলাঘাট পৌৰ এলেকাৰ দোকান-পোহাৰ সমূহ খোলাৰ নিৰ্দেশনা জাৰি কৰিছিল । ইতিমধ্যে নগৰখনত সামাজিক দুৰত্বকে ধৰি অন্যান্য সুবিধা উপলব্ধ হোৱাকৈ গোলাঘাট নগৰৰ চ'ক বজাৰত থকা শাক পাচলিৰ বজাৰৰ স্থান সলনি কৰিছে ।