কেব বিৰোধী আন্দোলনে মূৰৰ কামোৰণি বৃদ্ধি কৰিছে গোলাঘাট প্ৰশাসনৰ

কেব বিৰোধী প্ৰতিবাদৰ প্ৰতি লক্ষ ৰাখি গোলাঘাটৰ উপায়ুক্ত আৰু আৰক্ষী অধীক্ষকে সকলো দল সংগঠন, বিশিষ্ট ব্যক্তি আৰু সাংবাদিকক লৈ এক জৰুৰী সভাৰ আহ‌্বান কৰে ৷ সভাত গোলাঘাট প্ৰশাসনে সকলোকে গণতান্ত্ৰিকভাৱে প্ৰতিবাদ সাব্যস্ত কৰিবলৈ আহ্বান জনায় ৷

গোলাঘাট, 7 ডিচেম্বৰঃ নাগৰিকত্ব সংশোধনী বিধেয়কৰ বিৰুদ্ধে প্ৰতিবাদৰ সমান্তৰালকৈ মূৰৰ কামোৰণি বৃদ্ধি হৈছে চৰকাৰ তথা প্ৰশাসনৰ ৷ গোলাঘাটত শনিবাৰে পুৱাৰে পৰা বিভিন্ন সংগঠন তথা ছাত্ৰ-ছাত্ৰীয়ে প্ৰতিবাদ তীব্ৰতৰ কৰি তোলা পৰিলক্ষিত হৈছে । একাংশ প্ৰতিবাদী ছাত্ৰ আৰক্ষীৰ লগত হতাহতিতো লিপ্ত হয় ৷ এই সকলোবোৰৰ প্ৰতি লক্ষ্য ৰাখি গোলাঘাটৰ উপায়ুক্ত আৰু আৰক্ষী অধীক্ষকে সকলো সংগঠন, বিশিষ্ট ব্যক্তি আৰু সাংবাদিকক লৈ এক জৰুৰী সভাৰ আহ‌্বান কৰে ।

সভাত উপায়ুক্ত ধীৰেন হাজৰিকাই জনাই যে, অসম চৰকাৰে শান্তিপূৰ্ণভাৱে কৰা প্ৰতিবাদক কোনো ধৰণৰ বাধা নিদিবলৈ প্ৰশাসনক নিৰ্দেশ দিছে । সেয়ে গোলাঘাট প্ৰশাসনে সকলোকে গণতান্ত্ৰিকভাৱে প্ৰতিবাদ সাব্যস্ত কৰিবলৈ আহ্বান জনায় । তদুপৰি ৰাইজক আইন হাতত তুলি নলবলৈ অনুৰোধ জনায় । সভাত উপস্থিত থকা সংগঠন সমূহৰ বহুকেইজন নেতাই আন্দোলন সম্পৰ্কে বিভিন্ন ধৰণৰ মত প্ৰকাশ কৰে । বিশেষকৈ প্ৰশাসনক ছ’চিয়েল মিডিয়াত আন্দোলনক লৈ কৰা বিৰূপ মন্তব্যৰ প্ৰতি সজাগ থাকিবলৈ অনুৰোধ জনায় সংগঠনৰ বিষয়ববীয়াসকলে । প্ৰত্যুত্তৰত গোলাঘাটৰ আৰক্ষী অধীক্ষক পুষ্পৰাজ সিঙেও ছ’চিয়েল মিডিয়াত নজৰ ৰখা বুলি উল্লেখ কৰে ৷ তথা সকলোকে‌ শান্তিপূৰ্ণভাৱে প্ৰতিবাদ কৰিবলৈ আহ্বান জনায় ।

লগতে চাওকঃকেবৰ বিৰুদ্ধে আন্দোলন কৰা সকল বাংলাদেশী : বিধায়ক শিলাদিত্য