গোৱালপাৰা, 22 জানুৱাৰীঃ ভাৰত চৰকাৰৰ সুকণ্যা সমৃদ্ধি আঁচনিৰ বুধবাৰে পঞ্চম বৰ্ষপূৰ্তি উদযাপন কৰা হয় । ২০১৫ চনত প্ৰধানমন্ত্ৰী নৰেন্দ্ৰ মোডীয়ে শুভাৰম্ভ কৰে সুকণ্যা সমৃদ্ধি নামৰ অভিলাসী আঁচনিখনৰ । এই আঁচনি সম্পৰ্কে চৰকাৰৰ সমান্তৰালকৈ ভাৰতীয় ডাক বিভাগেও ৰাইজৰ মাজত সমানে সজাগতাৰ প্ৰয়াস কৰি আহিছে । গোৱালপাৰা ডাক অধীক্ষক দেৱৰাজ ছেঠীৰ নেতৃত্বত ছয়খন জিলাৰ প্ৰতিখন ডাক ঘৰ, উপ ডাকঘৰ আৰু শাখা ডাকঘৰৰ বিষয়া কৰ্মচাৰী সকলে প্ৰতিখন গাঁও অঞ্চলত সজাগতা অভিযান চলায় ।
২০১৯ বৰ্ষৰ ডিচেম্বৰ মাহৰ পৰা চলিত বৰ্ষৰ ১৮ জানুৱাৰী লৈ বালিকা শক্তি অভিযান চলোৱা হয় গোৱালপাৰা ডাক সংমণ্ডল এলেকাত । যাৰ ফলত অসম পৰিমণ্ডলৰ ভিতৰত গোৱালপাৰা ডাক সংমণ্ডলে সৰ্বাধিক ৩৮১১৪ টা সুকণ্যা একাউণ্ট খুলিবলৈ সক্ষম হয় । তদুপৰি চলিত বিত্তীয় বৰ্ষত ১৯১৩৫ টা আই পি পি বি একাউণ্ট খুলিবলৈ সক্ষম হোৱাৰ বিপৰীতে ১৭৭০৭ টা চেভিংছ একাউণ্ট খুলিবলৈ সক্ষম হৈছে । একেদৰে চলিত বিত্তীয় বৰ্ষত মুঠ প্ৰায় ১ লাখ একাউণ্ট খুলি এক ৰেকৰ্ড গঢ়িবলৈ সক্ষম হৈছে গোৱালপাৰা ডাক সংমণ্ডলে ।