পথ নিৰ্মাণৰ দাবীৰে টিংখাঙত শতাধিক ৰাইজৰ প্ৰতিবাদ

দেওবাৰে টিংখাঙৰ ৰাজপথত ওলাই আহিল কেইবাখনো গাঁৱৰ শতাধিক ৰাইজ ৷ সৰোজিনী চাহ বাগিচাৰ চিলিং গ্ৰাণ্টৰ পৰা চেঁচা নেপালীলৈকে ৩০ কিলোমিটাৰ দৈৰ্ঘৰ পথ নিৰ্মাণৰ কামত বাধা প্ৰদান কৰা চি পি আই (এম) নেতা বলিন্দ্ৰ শইকীয়াৰ বিৰুদ্ধে প্ৰতিবাদ ৰাইজৰ ৷

টিংখাং, 10 আগষ্ট: চি পি আই (এম) নেতা বলিন্দ্ৰ শইকীয়াক গ্ৰেপ্তাৰৰ দাবীৰে দেওবাৰে টিংখাঙৰ ৰাজপথলৈ ওলাই আহিল কেইবাখনো গাঁৱৰ শতাধিক ৰাইজ ৷ এটা পথৰ বাবে দীৰ্ঘদিনে দুৰ্ভোগ ভুগি আহিছে টিংখাঙৰ এটা বৃহত্তৰ অঞ্চলৰ ৰাইজে ৷ শেহতীয়াকৈ টিংখাঙৰ সৰোজিনী চাহ বাগিছাৰ চিলিং গ্ৰাণ্টৰ পৰা চেঁচা নেপালীলৈকে ৩০ কিলোমিটাৰ দৈৰ্ঘৰ এটা পথ নিৰ্মাণ কৰিবলৈ অনুমোদন প্ৰদান কৰিছিল চৰকাৰে ৷ কিন্তু এই পথটো নিৰ্মাণ কৰিবলৈ গ'লে কেইটামান পৰিয়ালৰ সামান্য পৰিমাণৰ ভূমি ক্ষতিগ্ৰস্ত হ'ব ৷

সেই বিষয়ৰ দোহাই দি চি পি আই (এম) নেতা বলিন্দ্ৰ শইকীয়াই কৃষক মহাসভাৰ নামত জিলা উপায়ুক্তৰ ওচৰত আবেদন জনাই পথটোৰ নিৰ্মাণ কাৰ্য বন্ধ কৰি দিয়াৰ অভিযোগ উত্থাপন হৈছে ৷

উক্ত পথটো নিৰ্মাণ হ'লে বহু কেইখন গাঁৱৰ ৰাইজৰ যাতায়াতৰ সুচল হৈ পৰিব ৷ কিন্তু তাকে নকৰি পথটো নিৰ্মাণৰ কাম বন্ধ কৰি দিয়া কাৰ্যত তীব্ৰ ক্ষোভ প্ৰকাশ কৰিছে শতাধিক ৰাইজে ৷ যাৰ বাবে প্ৰতিকূল বতৰকো নেওচি টিংখাঙৰ কেইবাখনো গাঁৱৰ ৰাইজ ৰাজপথলৈ ওলাই আহি, দেওবাৰে নেতা বলিন্দ্ৰ শইকীয়াৰ বাসগৃহ ঘেৰাও কৰি প্ৰতিবাদ সাব্যস্ত কৰিলে ৷ ইয়াৰ লগতে টিংখাং ৰাজহ চক্ৰ বিষয়াৰ কাৰ্যলয়ো ঘেৰাও কৰি নেতা বলিন্দ্ৰ শইকীয়াক অতি শীঘ্ৰে গ্ৰেপ্তাৰৰ কৰাৰ দাবীৰে ৷ ৰাইজে নেতা গৰাকীক গ্ৰেপ্তাৰৰ দাবীৰ লগতে পথটোৰ নিৰ্মাণকাৰ্য পুনৰ আৰম্ভ কৰিবলৈ চক্ৰ বিষয়াক এখন স্মৰক পত্ৰও প্ৰদান কৰে ৷

লগতে পঢ়ক:মৰিগাঁৱত চৰকাৰৰ বিৰুদ্ধে আছুৰ উত্তাল প্ৰতিবাদ