মৰাণ, ৩১ ডিচেম্বৰ : স্বাস্থ্য বিভাগৰ দায়িত্বহীনতা আৰু সদিচ্ছাৰ অভাৱৰ বাবে পঁয়ালগা অৱস্থা হৈছে ডিব্ৰুগড়ৰ চাচনীৰ ৰংপুৰ দীঘলী গাঁৱত থকা দীঘলী উপ-স্বাস্থ্যকেন্দ্ৰৰ(Pathetic condition of Dighalibeel sub health centre) । বিপদৰ সময়ত চিকিৎসক বিচাৰি হাহাকাৰ কৰিবলগীয়া হয় গাঁৱৰ ৰাইজে । তিনিখন গাঁৱৰ ৰাইজক সেৱা আগবঢ়োৱাৰ বাবে ৰংপুৰ দীঘলী গাঁৱত এই উপ-স্বাস্থ্যকেন্দ্ৰটো স্থাপন কৰা হৈছিল । কিন্তু পৰিতাপৰ কথা এয়ে যে, স্বাস্থ্যকেন্দ্ৰটো স্থাপন কৰাৰ পিছতো স্থায়ীভাৱে চিকিৎসক আৰু নাৰ্চ উপ-স্বাস্থ্যকেন্দ্ৰত নিযুক্তি নিদিলে স্বাস্থ্য বিভাগে (No medical team in Dighalibeel sub health centre)।
শেহতীয়াকৈ উপ-স্বাস্থ্যকেন্দ্ৰটোত থকা একমাত্ৰ নাৰ্চগৰাকীয়েও অৱসৰ গ্ৰহণ কৰাত সম্পূৰ্ণ ৰূপে বন্ধ হৈ পৰিছে গাঁওখনত থকা একমাত্ৰ উপ-স্বাস্থ্যকেন্দ্ৰটো । ফলত চিকিৎসাৰ বাবে গাঁৱৰ ৰাইজে গাঁঠিৰ ধন ভাঙি নাহৰকটীয়া অথবা দুলীয়াজান চহৰলৈ বাট বুলিবলগীয়া হয় । আনকি, চিকিৎসালয়খনত চিকিৎসক নথকাৰ বাবে সংকটজনক অৱস্থাত থকা ৰোগী অন্য চিকিৎসালয়লৈ নিবলগীয়া হয় আৰু চিকিৎসালয়লৈ নিয়া অৱস্থাত ৰোগীয়ে মৃত্যুবৰণ কৰাৰো উদাহৰণ আছে বুলি স্থানীয় ৰাইজে জানিবলৈ দিছে ।