টিংখাং, 1 আগষ্ট : টিংখাঙত প্ৰহসনত পৰিণত হৈছে জলসিঞ্চন আঁচনি (Irrigation Project) । টিংখাঙৰ কেন্দুগুৰি গাওঁ পঞ্চায়তৰ অন্তৰ্গত ১ নং বৰবিল গাঁৱৰ জলসিঞ্চন আঁচনিখন বহু বছৰ ধৰি বিকল হৈ আছে । যাৰ বাবে জলসিঞ্চনৰ ব্যৱস্থা থকাৰ পাছতো পানীৰ অভাৱত শালিধানৰ খেতি কৰিব পৰা নাই গাঁওখনৰ বহু কৃষক ৰাইজে । কৃষি প্ৰধান অঞ্চলটোৰ ৰাইজৰ বাবে অতি প্ৰয়োজনীয় এই জলসিঞ্চন আঁচনিখন পুনৰ কাৰ্যকৰী কৰি তুলিবলৈ বিভাগীয় কৰ্তৃপক্ষক বাৰম্বাৰ আবেদন-নিবেদন জনোৱাৰ পাচতো কোনো সুফল নধৰিল ।
বিভাগীয় কৰ্তৃপক্ষৰ গা-এৰা দিয়া মনোভাৱৰ বাবে মেৰামতিৰ অভাৱত আঁচনিখনৰ বহু যন্ত্ৰ-পাতি ইতিমধ্যে নষ্ট হ'বলৈ ধৰিছে । যি সময়ত পৰ্যাপ্ত বৰষুণৰ অভাৱত কৃষকে মূৰে-কপালে হাত দিব লগা হৈছে তেনে সময়ত গাঁওবাসীৰ বাবে একপ্ৰকাৰ হাৰমালত পৰিণত হৈছে এই আঁচনিখন । আঁচনিখন সঠিক ৰূপত পৰিচালিত হোৱা হ'লে উপকৃত হ'লহেঁতেন ১ নং আৰু ২ নং বৰবিল গাঁৱৰ শতাধিক কৃষক ৷