বেৰভাঙী ৰাজ্যিক চিকিৎসালয়ৰ আজৱ কাহিনী

এখন আজৱ চিকিৎসালয় ৷ য'ত চিকিৎসকৰ দায়িত্বত থাকে ফাৰ্মাচিষ্ট, ফাৰ্মাচিষ্টৰ দায়িত্বত থাকে নাৰ্চ আৰু ড্ৰেচাৰৰ দায়িত্ব পালন কৰে চকীদাৰে ৷

ধুবুৰী, 28 জুনঃ ধুবুৰী জিলাৰ ভাৰত-বাংলা সীমান্তৰ এখন আজৱ চিকিৎসালয় ৷ য'ত চিকিৎসকৰ দায়িত্বত থাকে ফাৰ্মাচিষ্ট, ফাৰ্মাচিষ্টৰ দায়িত্বত থাকে নাৰ্চ আৰু ড্ৰেচাৰৰ দায়িত্ব পালন কৰে চকীদাৰে ৷ সীমান্তৰ প্ৰায় কুৰিখন গাঁৱৰ ৰাইজৰ একমাত্ৰ ভৰসাৰ থল বেৰভাঙী ৰাজ্যিক চিকিৎসালয় চলিছে এনেদৰেই | চিকিৎসালয়খনত চিকিৎসক হিচাপে ডা• নজৰুল ইচলাম, ডা• ফৰিদা ইয়াচমিন আৰু ডা• সঙ্গীতা মণ্ডলে নিযুক্তি লাভ কৰে | যদিও তিনিওজনৰ এজনেও নিয়মীয়াকৈ উপস্থিত নোহোৱাৰ অভিযোগ ৰাইজৰ | যাৰ বাবে ফাৰ্মাচিষ্ট মোৱাৰক আলীয়ে অকলে ৰোগী চাব লগীয়া হয় | ফলত ফাৰ্মাচিষ্টৰ দায়িত্ব পালন কৰে নাৰ্চে | ফলত এটা চেলাইন বা বেজীৰ কাৰণে ৰোগীয়ে ঘন্টাৰ পাচত ঘন্টা ধৰি বহি থাকিবলগীয়া হয় চিকিৎসালয় চৌহদত |

ইপিনে দুবছৰ পূৰ্বে ড্ৰেচাৰজন বদলি হৈ যোৱাত ড্ৰেচাৰৰ দায়িত্ব পালন কৰিছে চকীদাৰগৰাকীয়ে ৷ চিকিৎসালয়খনৰ সোপাধিলা নীতিৰ সুযোগ লৈ স্থানীয় এগৰাকী দালালে চিকিৎসালয়তে আৰম্ভ কৰিছে জন্মৰ প্ৰমাণ-পত্ৰৰ মুকলি বেহা |