এটা অসহায় দৰিদ্ৰ পৰিয়াল

এসাঁজ খাই এসাঁজ নোখোৱাকৈ জীৱন নিৰ্বাহ কৰা ধুবুৰীৰ বৃদ্ধ দম্পত্তিৰ কাহিনী ৷ চাৰিওফালে লেতেৰা বোকা পানীৰে ভৰ্তি জহি খহি যোৱা এটা জুপুৰি সদৃশ ঘৰতেই অতিবাহিত কৰিছে জীৱনৰ বিয়লি বেলা ৷

ধুবুৰী, 7 মে': ধুবুৰী বিধানসভা সমষ্টিৰ ঝগৰাৰপাৰ প্ৰথম খণ্ড গাঁৱৰ এহাল বৃদ্ধ দম্পত্তিৰ কাহিনী ৷ অস্বাস্থ্যকৰ পৰিৱেশৰ মাজতে আনে দিয়া ভাত মুঠিৰে এসাঁজ খাই, এসাঁজ নোখোৱাকৈ পাৰ কৰিছে দিন ৰাতি ৷ থাকিবলৈ নাই এটা ভাল বাসগৃহও, জহি-খহি যোৱা ঘৰৰ মাজতেই কটাইছে জীৱন ৷ দুগৰাকী পত্নী আৰু তিনিগৰাকী কন্যা সন্তানে বসবাস কৰা আয়নাল হ'কৰ তিনিওগৰাকী কন্যাৰ বিয়াৰ পাচতে এতিয়া নৰক যন্ত্ৰনা ভোগ কৰিবলগীয়া হৈছে পৰিয়ালটোৱে ৷

ইপিনে চৰকাৰী সা-সুবিধাৰ পৰাও বঞ্চিত 85 বছৰীয়া আইনল হ'কৰ পৰিয়ালটো ৷ উৎকোচ দিব নোৱাৰাৰ বাবেই নিজৰ নামত শৌচাগাৰ লাভৰ পৰাও বঞ্চিত হয় বৃদ্ধগৰাকীৰ পৰিয়ালটো ৷ ফলত এতিয়া ৰাইজৰ সহায় বিচাৰিছে দৰিদ্ৰ পৰিয়ালটোৱে ৷