বিলাসীপাৰা , 2 মে' : মানৱতাক লজ্জানত কৰা এক জঘন্য ঘটনাই জোকাৰি গৈছে সমগ্ৰ ৰাজ্য | এই নৃশংস ঘটনা সংঘটিত হৈছে পশ্চিম বিলাসীপাৰাত | এজন সত্তৰোৰ্ধৰ বৃদ্ধক সোপাধৰাৰ সন্দেহত অমানসিক ভাবে মাৰধৰ | জীৱনৰ বিয়লি বেলাত অন্ধবিশ্বাসৰ বলি হৈ গণ প্ৰহাৰত মৃত্যুৰ ক্ষণ গনিব লগীয়া হৈছে এজন 75 বছৰীয়া বৃদ্ধই |
লগতে পঢ়ক: বহিঃৰাজ্যত অসমীয়া যুৱকৰ মৃত্যু, আহত পিতৃ
পশ্চিম বিলাসীপাৰাৰ ফকিৰপাৰাৰ বাসিন্দাগৰাকীৰ নাম মজাফ্ফৰ আলী | পৰিয়ালৰ লোকৰ মতে বুধবাৰে নিশা ব্যক্তিগত কাম এটাৰ বাবে নিজ ঘৰৰ পৰা মাত্ৰ 5 কিলোমিটাৰ দূৰত্বত থকা বাঙালীপাৰা বজাৰলৈ গৈছিল | নিজৰ কাম শেষ কৰি নিশা 12 টা মান বজাত ঘৰলৈ আহি থাকোতে আধাবাটত হঠাতে মুষলধাৰ বৰষুণ আৰম্ভ হোৱাত সমীপতে থকা ঠকঠকী পাৰা গাঁৱৰ ছমছেৰ আলীৰ ঘৰত সোমায় | মাজ নিশা বৃদ্ধ গৰাকীক ঘৰৰ চোতালত দেখা পাই সোপাধৰা বুলি চিঞৰ বাখৰ আৰম্ভ কৰে ৷
বৃদ্ধ জনৰ পৰিয়ালৰ লোকে খবৰ পাই পুৱতি নিশা বৃদ্ধ জনক গাঁওখনৰ পৰা উদ্ধাৰ কৰি বিলাসীপাৰা চৰকাৰী চিকিৎসালয়ত ভৰ্তি কৰে | অন্ধবিশ্বাসৰ বলি হোৱা বৃদ্ধ জনে বুকু পিঠিত বেয়া কৈ আঘাত প্ৰাপ্ত হোৱাৰ লগতে বাঁওভৰি আৰু সোঁ হাত খন ভাঙি যোৱা বুলি জানিব পৰা গৈছে | সম্প্ৰতি অতি দৰিদ্ৰ পৰিয়ালৰ বৃদ্ধজন সংকটজনক অৱস্থাত আছে |
অন্ধবিশ্বাসী এই সকল পাষণ্ডক আইনৰ আওতালৈ আনি কঠোৰ শাস্তি প্ৰদানৰ দাবী তুলিছে সচেতন ৰাইজে |