ধুবুৰী, 17 আগষ্ট :নতুন SOPক লৈ অসন্তুষ্ট ধুবুৰী জিলাৰ মটৰ পৰিবহন মালিক সন্থা । আন্তঃজিলাৰ বাছ চলাচলৰ দাবীত মঙলবাৰে ধুবুৰী জিলা মটৰ পৰিবহন মালিক সন্থাই ধুবুৰী বাছ আস্থানৰ কাৰ্যালয়ত এক সংবাদমেলৰ আয়োজন কৰে । চৰকাৰক দাবী পূৰণ কৰিবলৈ ১৯ আগষ্ট লৈকে চৰকাৰক সময়সীমা বান্ধি দিয়ে মটৰ পৰিবহন মালিক সন্থাই ।
উল্লেখ্য যে, ক'ভিড পৰিস্থিতিয়ে বাৰুকৈয়ে সৰিয়হৰ ফুল দেখুৱাইছে যাত্ৰবাহী বাছৰ মালিক আৰু কৰ্মচাৰী সকলক । যোৱা মাহ কেইটাত উপাৰ্জনৰ পথ বন্ধ হৈ থকাত এতিয়া আৰ্থিক সংকটত ভুগিবলগীয়া হৈছে বাছৰ মালিক আৰু কৰ্মচাৰীসকল ৷ ফলত এতিয়া পৰিয়াল পোহপাল দি'বলৈ হাহাকাৰ কৰিবলগীয়া হৈছে মালিক আৰু কৰ্মচাৰী সকলকে ৷ ইফালে, সংকটৰ সময়তো চৰকাৰক আদায় দিব লগা হৈছে নিয়মিত কৰ ।
লগতে পঢ়ক:নিৰাপত্তাহীনতাত আফগানিস্তানৰ মহিলাসকল
চৰকাৰে ঘোষণা কৰা নতুন ক'ভিড বিধি অনুসৰি কিছু শিথিলতা প্ৰদান কৰি খুলি দিয়া হৈছে আন্তঃজিলাৰ যাতায়ত । কিন্তু নতুন SOP অনুসৰি দোকান-পোহাৰ, বজাৰ-ঘাট আদি বহু ক্ষেত্ৰত ৰেহাই দিয়াৰ লগতে আন্তঃজিলা যাতায়ত খুলি দিয়া হৈছে যদিও যাত্ৰীবাহী বাছ চলাচলৰ ক্ষেত্ৰত ৰেহাই দিয়া নাই চৰকাৰে ।
যাত্ৰীবাহী বাছসমূহ পূৰ্বৰ নীতি অনুসৰি জিলাৰ ভিতৰতেই চলাচল কৰিব লাগিব বুলি উল্লেখ কৰা হৈছে নতুন SOPত । ইয়াকে লৈ ক্ষোভিত হৈ পৰিছে ৰাজ্যৰ মটৰ পৰিবহন মালিক সন্থা । ধুবুৰী জিলা মটৰ পৰিবহন মালিক সন্থাই সংবাদমেলৰ জৰিয়তে চৰকাৰক ১৯ আগষ্টলৈকে সময়সীমা বান্ধি দি যাত্ৰীবাহী বাছৰ চলাচলৰ ক্ষেত্ৰত ৰেহাই দিয়াৰ দাবী জনাইছে ।