ধেমাজিত উদ্ধাৰ অৰুণাচলৰ চুৰি গাড়ী

মঙলবাৰে নিশা চুবুৰীয়া ৰাজ্য অৰুণাচল প্ৰদেশৰ লংডিং জিলাৰ পৰা গাড়ী চুৰি চক্ৰই চুৰ কৰি অনা এখন বগা ৰঙৰ স্ক’ৰপিঅ’ গাড়ী পৰিত্যক্ত অৱস্থাত উদ্ধাৰ হৈছে ৷ ধেমাজি অসামৰিক চিকিৎসালয়ৰ চৌহদত উদ্ধাৰ হয় বাহনখন ৷ উক্ত ঘটনাই উদঙাই দিছে ধেমাজি সদৰ আৰক্ষীৰ বিফলতাক ৷

ধেমাজি,24 ফেব্ৰুৱাৰীঃধেমাজিত ক্ৰমান্বয়ে সক্ৰিয় হৈছে গাড়ী চুৰি চক্ৰ ৷ ধেমাজি আৰক্ষীৰ নিষ্ক্ৰিয়তাৰ সুযোগ লৈ চহৰখনত নিৰ্বিঘ্নে টিঘিল-ঘিলাই ফুৰিবলৈ সক্ষম হৈছে গাড়ী চোৰ ৷ মঙলবাৰে নিশা চুবুৰীয়া অৰুণাচল প্ৰদেশৰ লংডিং জিলাৰ পৰা এটা গাড়ী চুৰি চক্ৰই চুৰি কৰি অনা এখন বগা ৰঙৰ স্ক’ৰপিঅ’ বাহন পৰিত্যক্ত অৱস্থাত ধেমাজি অসামৰিক চিকিৎসালয়ৰ চৌহদত উদ্ধাৰ হোৱা ঘটনাই উদঙাই দিছে ধেমাজি সদৰ আৰক্ষীৰ বিফলতাক ৷

উল্লেখ্য যে, অৰুণাচলৰ লংডিঙৰ এগৰাকী বাসিন্দাৰ বাসগৃহৰ পৰা সোমবাৰে নিশা AR-01 L 2138 নম্বৰৰ বগা ৰঙৰ স্ক’ৰপিঅ’ গাড়ীখন চুৰি কৰি মাজপথতে নম্বৰপ্লেট সলনি কৰি অসমৰ ভূৱা নম্বৰ লগাই ধেমাজি চহৰৰ মাজেৰে গৈ গোগামুখ পায় ৷ তাৰ পিচতে চোৰে গাড়ীখন গোগামুখৰ পৰা ঘূৰাই আনি ধেমাজি অসামৰিক চিকিৎসালয়ৰ পিচফালে এৰি থৈ যায় ৷ ইপিনে বাহনখনৰ গৰাকীয়ে লংডিং আৰক্ষী চকীত তৰা এক গোচৰৰ ভিত্তিত (গোচৰ নম্বৰ- PS 05/2021) অৰুণাচল আৰক্ষীয়ে স্ক’ৰপিঅ’খনত সংলগ্ন জিপিএছ ট্ৰেক কৰি ধেমাজি আৰক্ষীৰ সহযোগত গাড়ীখন উদ্ধাৰ কৰিবলৈ সক্ষম হয় ৷

লগতে পঢ়কঃ বাঁহীবাদক প্ৰভাত শৰ্মাৰ দেহাৱসান