জোনাই, 28 ফেব্ৰুৱাৰী: ঐতিহাসিক অসমৰ ৰোগ-চিকিৎসাৰ বাবে বহু দূৰৰ পৰা অসমৰ বৈদ্য-কবিৰাজ সকলৰ ওচৰলৈ ৰোগী অহাৰ কথা ইতিহাসে সাক্ষ্য বহন কৰে৷ যিসমূহ বনৌষধিয়ে এসময়ত আন লোকৰ চিকিৎসাৰ মহৌষধ হিচাপে কাম দিছিল, সেই বনৌষধিজাত সামগ্ৰীসমূহে আজিও অসমীয়া গাঁৱলীয়া সমাজত এক সুকীয়া স্থান বহন কৰি আহিছে ৷ অসমৰ সমাজ জীৱনত এক সুকীয়া স্থান বহন কৰা এই বনৌষধি চিকিৎসাসেৱাক জীয়াই ৰখাৰ প্ৰচেষ্টাৰে জোনাইৰ এগৰাকী ব্যক্তিয়ে নীৰৱে চলাই আহিছে চিকিৎসা সেৱা (Herbal treatment in Jonai)।
বনৌষধি চিকিৎসাক জীয়াই ৰাখিছে জোনাইৰ মটুৰা পেগুৱে জোনাইৰ কেমি জেলম পঞ্চায়তৰ অন্তৰ্গত ওপৰ চিৰুং গাঁৱৰ মটুৰা পেগুৱে বহু বছৰ পূৰ্বৰ পৰাই বিভিন্ন ৰোগত আক্ৰান্ত লোকসকলক বনৌষধৰ জৰিয়তে চিকিৎসা কৰি অসংখ্য লোকক সুস্থ কৰি তুলিবলৈ সক্ষম হৈছে৷ মটুৰা পেগুৰ এই প্ৰচেষ্টাক সন্মান জনাই ৰাজ্যৰ বিভিন্ন দল সংগঠনৰ লগতে ৰাজ্য চৰকাৰেও প্ৰদান কৰিছে সন্মান ৷
বিশেষকৈ মানুহৰ হাড় ভঙা, কৰ্কট, চাইনাচ আদি বিভিন্ন ৰোগত আক্ৰান্ত ৰোগীক বনৌষধেৰে চিকিৎসা কৰে মটুৰা পেগুৱে৷ যিহেতু অসমৰ হাবিৰ পৰা বৰ্তমান সময়ত বহু বনৌষধিৰ প্ৰজাতি লুপ্ত হৈ গৈছে, সেয়েহে যিবোৰ গছ এতিয়াও লুপ্ত হোৱা নাই তাৰে কিছু বনৌষধিৰ প্ৰজাতি মটুৰা পেগুৱে সংৰক্ষণ কৰিছে তেওৰ নিজৰ বাৰীতে৷ নিজৰ বাৰীতে উপলব্ধ এইসমূহ বনৌষধেৰে মটুৰা পেগুয়ে কৰি গৈছে ৰোগীৰো চিকিৎসা৷ মটুৰা পেগুয়ে অৱগত কৰা মতে, অসম চৰকাৰে বনৌষধ সমূহ নিৰীক্ষণ কৰি তাক ব্যৱহাৰ কৰিব পাৰিব বুলিও স্বীকৃতি দিছে ৷
বিগত বৰ্ষৰ আগষ্ট মাহত হাইদৰাবাদস্থিত ইন্টাৰনেচনেল এক্ৰিডিটেচন অৰগেনাইজেচনৰ (International Accreditation Organisation) তত্বাৱধানত আৰু হলিষ্টিক মেডিচিন ৰিচাৰ্ছ ফাউণ্ডেচনৰ (Holistic Medicine research) উদ্যোগত অনুষ্ঠিত পৰম্পৰাগত চিকিৎসা গৱেষণাৰ এক অনুষ্ঠানলৈ নিমন্ত্ৰিত হৈছিল মটুৰা পেগু৷ দেশৰ বিভিন্ন প্ৰান্তৰ পৰম্পৰাগত চিকিৎসা গৱেষকে অংশ লোৱা এই অনুষ্ঠানতে মটুৰা পেগুক প্ৰদান কৰা হয় ইন্টাৰনেচনেল অফ টেদিচনেল হিলাৰ বঁটা(International of Traditional Healer ২০২১)৷
উল্লেখ্য যে, উত্তৰ-পূৰ্বাঞ্চলত সমৃদ্ধ প্ৰায় ১৫০০ বনৌষধিৰ প্ৰজাতিৰ প্ৰায় ১৪১ বিধ প্ৰজাতিৰ বনৌষধি কেৱল অসমতে পোৱা গৈছিল । অতি প্ৰাচীন কালৰে পৰা এই বনৌষধিবোৰৰ ঔষধ গুণৰ বাহিৰেও ইয়াৰ অৰ্থনৈতিক গুৰুত্ব অপৰিসীম । কিন্তু চৰকাৰৰ দ্বাৰা এইসমূহ বনৌষধিৰ প্ৰজাতিৰ সংৰক্ষণৰ বাবে কোনো বিশেষ কৰ্মপন্থা, আঁচনি যুগুত নকৰাৰ ফলত বিলুপ্ত হৈ পৰিছে বনৌষধিৰ বহু প্ৰজাতি ৷ চৰকাৰে এই ক্ষেত্ৰত গুৰুত্ব প্ৰদানেৰে প্ৰয়োজনীয় পদক্ষেপ গ্ৰহণ কৰিলে এই ক্ষেত্ৰখনে বহু নিবনুৱা যুৱক-যুৱতীৰ বাবে নিয়োগৰ বাট মুকলি কৰিব ৷ তাৰোপৰি বিশ্বৰ সৰ্বত্ৰে এইসমূহ প্ৰাকৃতিক সম্পদৰাজিৰ বাণিজ্যিক প্ৰসাৰ হোৱাৰ লগতে লাখ লাখ মানুহৰো স্বাস্থ্যৰ উন্নতি সাধন হ’ব ।
লগতে পঢ়ক:শ্ৰীমন্ত শংকৰদেৱে অসমত থকা ঠাইসমূহ সংৰক্ষণৰ ব্যৱস্থা কৰিব চৰকাৰে : মুখ্যমন্ত্ৰী
