ধেমাজি,২১ ফেব্ৰুৱাৰী: স্বাস্থ্য ভালে থাকিলেহে মন ভালে থাকে । দেহাই বেহা । এই কথাকে সাৰোগত কৰি ধেমাজিত সংগীতৰ তালে তালে শৰীৰ চৰ্চা এজাক শিশু, কিশোৰী আৰু মহিলাৰ । এটা সুস্থ নিৰোগী শৰীৰতহে সুস্থ মনৰ সৃষ্টি হয় ৷ এগৰাকী ব্যক্তিৰ শৰীৰ আৰু মন স্বাস্থ্যবান হ'লেহে সুস্বাস্থ্যৰ গৰাকী বুলি ক’ব পাৰি ৷ সেয়ে বৰ্তমান সময়ত সুস্বাস্থ্যৰ বাবে পুষ্টিকৰ খাদ্যৰ উপৰিও শাৰীৰিক ব্যায়ামৰ ক্ৰিয়া-কলাপৰ প্ৰয়োজন ৷
বৰ্তমান সময় সলনি হোৱাৰ লগে লগে সলনি হৈছে শাৰীৰিক ব্যায়ামৰ ক্ৰিয়া-কলাপ ৷ অত্যাধুনিক জিমৰ সমান্তৰালভাৱে এইক্ষেত্ৰখনত সংযোজন ঘটিছে জুম্বা পদ্ধতিৰ ৷ সংগীতৰ তালে-তালে শৰীৰ অংগ সঞ্চালনাৰ জৰিয়তে সু স্বাস্থ্যৰ অধিকাৰী হোৱাৰ নতুন উপায় হৈছে জুম্বা ৷ সেয়ে আধুনিক জীৱন শৈলীত অভ্যস্ত হোৱা সকলোৰে বাবে সুস্বাস্থ্য অটুট ৰখা মূলমন্ত্ৰ কঢ়িয়াই আনিছে আধুনিক জুম্বাই ৷ সেই উদ্দেশ্য শনিবাৰে ধেমাজি ডি আৰ ডি এ প্ৰাংগনত জুম্বা অনুষ্ঠানটোৰে বিশেষভাৱে 'জুম্বা মাষ্টাৰ ক্লাছ' প্ৰদৰ্শন কৰি উপস্থিত সকলোকে আমোদ দিয়ে ৷