ধেমাজি, ১১ জানুৱাৰী: সদৌ ধেমাজি জিলা ছাত্ৰ সন্থাৰ উদ্যোগত সোমবাৰে ধেমাজি প্ৰেছ ক্লাৱত সদৌ অসম ছাত্ৰ সন্থাৰ নৱনিৰ্বাচিত সাধাৰণ সম্পাদক শংকৰজ্যোতি বৰুৱাক সম্বৰ্ধনা জনোৱা হয় ৷ সদৌ ধেমাজি জিলা ছাত্ৰ সন্থাৰ সাধাৰণ সম্পাদক কল্যাণ গগৈয়ে আঁত ধৰা অনুষ্ঠানত ধেমাজি জিলা ছাত্ৰ সন্থাৰ লগতে বিভিন্ন আঞ্চলিক ছাত্ৰ সন্থাৰ বিষয়ববীয়া,অসম জাতীয়তাবাদী যুৱ ছাত্ৰ পৰিষদ,ধেমাজি শাখা সাহিত্য সভা,গোৰ্খা ছাত্ৰ সন্থাৰ বিষয়ববীয়াই শংকৰজ্যোতি বৰুৱাক উষ্ম আদৰণি জনায় ।
নৱ নিৰ্বাচিত সাধাৰণ সম্পাদকগৰাকীয়ে কয় যে,জটিল সময়ত গুৰু দায়িত্বভাৰ ল'বলগীয়া হোৱাৰ বাবে তীব্ৰ প্ৰত্যাহ্বানৰ সন্মুখীন হৈছে ৷ সকলোৰে দিহা-পৰামৰ্শ লৈ এই প্ৰত্যাহ্বান নেওচি আগুৱাই যাব লাগিব বুলি মন্তব্য কৰি শাসনাধিষ্ঠিত চৰকাৰকো তেওঁ তীব্ৰ সমালোচনা কৰে ৷ আনহাতে,ডিব্ৰুগড় জিলাত বগীবিল দলঙৰ সমীপত নিৰ্মীয়মান হৈ থকা টোল গেটে ধেমাজি আৰু লখিমপুৰৰ জনসাধাৰণৰক তীব্ৰ মাধমাৰ শোধাব বুলি আশংকা কৰি ইয়াৰ বাবে এতিয়াই ধেমাজি আৰু লখিমপুৰ ছাত্ৰ সন্থাক আন্দোলন কৰিবলৈ আহ্বান জনায় ৷