জোনাই,26 এপ্ৰিল:সমগ্ৰ ৰাজ্যখনত কৰ’ণা ভাইৰাছৰ আতংকই বিৰাজ কৰি থকাৰ সময়তে ধেমাজি জিলাৰ জোনাই থানাৰ অন্তৰ্গত গালী চিকাৰীত এটা বৃহৎ ড্ৰাগছৰ ঘাটি উৎখাত কৰা হৈছে ৷ এই ঘটনাই অসম-অৰুণাচলৰ সীমান্তৱৰ্তী অঞ্চলটোত চাঞ্চল্যৰ সৃষ্টি হৈছে ।
ঘটনাৰ বিৱৰণী অনুসৰি, কিছুদিন আগৰ পৰাই জোনাই থানাৰ গালী চিকাৰী অঞ্চলৰ লালী নদীৰ পাৰৰ সাধুঘাটস্থিত ঘন জাৰণিলৈ বিলাসী গাড়ীৰ সৈতে যুৱকৰ সঘন আহ-যাহ চলি থকা প্ৰত্যক্ষ কৰি স্থানীয় ৰাইজৰ মাজত সন্দেহ হৈছিল । দেওবাৰে সন্ধিয়া এখন ডাষ্টাৰ, এখন কাৰ আৰু তিনিখনকৈ মটৰ চাইকেল বৰং শান্তিপুৰ সংযোগী পথৰ পৰা বৰং কৃষ্ণপুৰ গাওঁ হৈ সাধুঘাটলৈ যোৱা প্ৰত্যক্ষ কৰে স্থানীয় ৰাইজে ।
টিএমপিকে আৰু এমএমকেৰ গালী চিকাৰী আঞ্চলিক সমিতিৰ উদ্যোগত গালীত কৰ’ণা মহামাৰীৰ বিষয়ত সজাগতা সৃষ্টিৰ উদ্দেশ্যি এখন সভা চলি থকাৰ সময়তে স্থানীয় প্ৰত্যক্ষদৰ্শী ৰাইজে গালী আঞ্চলিক টিএমপিকে, এমএমকেক খবৰ দিয়াৰ লগে লগে মিচিং জাতীয় সংগঠন দুটাৰ বিষয়ববীয়া, কৰ্মীয়ে সন্ধিয়া সাধু ঘাটত উপস্থিত হৈ ড্ৰাগছ সেৱন কৰি থকা অৱস্থাত অঞ্চলটো ঘেৰাও কৰে ।