খাৰুপেটীয়াত দিন ডকাইতি: চোঁচৰাই নিলে মহিলাক

খাৰুপেটীয়াত দিন দুপৰতে দুই বাইকৰ আৰোহীয়ে চোঁচৰাই নিলে মহিলাক ৷ প্ৰায় 50 মিটাৰ পথ চোঁচৰাই নিয়াৰ ফলত গুৰুতৰ ভাৱে আঘাতপ্ৰাপ্ত হ'ল মহিলা গৰাকী ৷

দলগাঁও, 29 জুলাই : দৰঙৰ খাৰুপেটীয়াত দিন দুপৰতে সংঘটিত হ'ল এক শিহৰণকাৰী ডকাইতিৰ ঘটনা ৷ হিন্দী চিনেমাৰ কায়দাৰে দুই বাইক আৰোহীয়ে এগৰাকী মহিলাক চোঁচৰাই নিয়াৰ দৃশ্য বন্দী হ'ল চিচি কেমেৰাত ৷ খাৰুপেটীয়া ষ্টেট বেংকৰ পৰা বেগ লৈ ওলাই অহা কবিতা কলিতা নামৰ মহিলা গৰাকীৰ হাতৰ পৰা বেগ কাঢ়ি নিয়াৰ চেষ্টা চলায় দুই যুৱকে ৷ কিন্তু মহিলা গৰাকীয়ে বেগটো এৰি নিদিয়াত দুই দুৰ্বৃত্তই 15নং ৰাষ্ট্ৰীয় ঘাইপথেৰে প্ৰায় 50 মিটাৰ পথ চোঁচৰাই নিয়ে মহিলা গৰাকীক ৷

খাৰুপেটীয়া ষ্টেট বেংক

অৱশেষত মহিলা গৰাকীয়ে ঘাইপথত এৰি তীব্ৰ বেগেৰে পলায়ন কৰে ডকাইত দুটা ৷ উল্লেখ্য যে,মহিলা গৰাকী হৈছে শ্যামপুৰ উপ-স্বাস্থ্য কেন্দ্ৰত নাৰ্চ হিচাপে কৰ্মৰত ৷ আহত মহিলা গৰাকীক ততাতৈয়াকৈ খাৰুপেটীয়া প্ৰাথমিক স্বাস্থ্য কেন্দ্ৰত ভৰ্তি কৰোৱা হয় ৷