বঙাইগাঁও , ৩০ জুন:সদৌ অসম সংখ্যালঘু ছাত্ৰ ইউনিয়ন চমুকৈ আমছুয়ে সমগ্ৰ অসমতে সংখ্যালঘু সমাজত প্ৰচলিত থকা বিভিন্ন অসামাজিক কাৰ্য্যকলাপ বন্ধৰ দাবীত সজাগতামুলক কাৰ্যসূচী ৰূপায়ন কৰি আহিছে । তেনে সময়তে আজি বঙাইগাঁও জিলা সমিতিৰ অন্তৰ্গত ঢালিগাঁও আঞ্চলিক সমিতি আমছুয়ে বৰপথাৰ বজাৰৰ পৰা আৰম্ভ কৰি বৰপথাৰ দীৰ্ঘ প্ৰায় পাঁচ কি:মি: অতিক্ৰম কৰি পুনৰ বৰপথাৰ প্ৰাথমিক বিদ্যালয়লৈ এক সজাগতা সমদল উলিয়াই । এই সজাগতা সমদলৰ পিচতে আন এক সজাগতা সভা অনুষ্ঠিত হয় ।
বঙাইগাঁও জিলা সমিতি আমছুৰ সভাপতি হজৰত আলীৰ সভাপতিত্বত অনুষ্ঠিত এই সজাগতা সভাত সংখ্যালঘু সমাজত প্ৰচলিত বাল্যবিবাহ, শিশু শ্ৰমিক, মদ, জুৱাকে আদি কৰি সকলোবোৰ অসামাজিক কাৰ্যকলাপৰ বিষয়ে সজাগতামূলক আলোচনা কৰা হয় । এই সভাত বঙাইগাঁও জিলা সমিতি আমছুৰ উপদেষ্টা তফিৰুদ্দিন আহমেদ উপস্থিত থাকি নিজৰ বক্তব্য আগবঢ়াই । সমগ্ৰ অসমতে সংখ্যালঘু সমাজত প্ৰচলিত থকা এই সমূহ অসমাজিক কাৰ্য্যকলাপ বন্ধ নকৰালৈকে জনগোষ্ঠীটোৰ উন্নয়ন সম্ভৱ নহয় বুলি আমছু নেতৃত্বই মন্তব্য কৰে । সেয়ে সংগঠনটোৱে সংখ্যালঘু সমাজৰ সমূহ নেতৃত্ব আৰু স্থানীয় লোকৰ লগতে যুৱক সকলক এই ক্ষেত্ৰত আগবাঢ়ি আহি জনগোষ্ঠীটোক উদ্ধাৰৰ আহ্বান জনায় ।