কাছাৰ, 11 জুলাই : কাছাৰ জিলাৰ অসম-মিজোৰাম সীমান্তৰ ধলাখালত শুকুৰবাৰে বোমা বিস্ফোৰণ সংঘটিত হয় ৷ সীমান্তৰ এটা পথ নিৰ্মাণ কৰিবলৈ যোৱা অসমৰ প্ৰশাসনিক বিষয়াসকলক লক্ষ্য কৰি মিজো দুষ্কৃতিকাৰীয়ে গ্ৰেণেড নিক্ষেপ কৰে ৷ ইয়াৰ ফলত কাছাৰৰ সীমান্ত অঞ্চলত এক উত্তপ্ত পৰিস্থিতিৰ সৃষ্টি হয় ৷ অৱশেষত ঘটনাস্থলীত অসম আৰক্ষীৰ অতিৰিক্ত আৰক্ষী সঞ্চালক প্ৰধান হৰমিত সিং, কাছাৰ জিলাৰ আৰক্ষী অধীক্ষক আৰু জিলা উপায়ুক্তসহ আৰক্ষীৰ এক বিশাল বাহিনী উপস্থিত হৈ পৰিস্থিতি নিয়ন্ত্ৰণ কৰে ৷
সীমান্তৱৰ্তী অঞ্চলটোত পৰিস্থিতি যিকোনো সময়তে অধিক ভয়াৱহ হোৱাৰ সম্ভাৱনা প্ৰকট হৈ পৰিছে ৷ সংবাদ সংগ্ৰহৰ বাবে যোৱা সাংবাদিকসকলক অতিৰিক্ত আৰক্ষী সঞ্চালক প্ৰধান হৰমিত সিঙে (ADGP) বাধা দিয়ে ৷ আনকি ৰহস্যজনকভাৱে কৰ্তব্যৰত সাংবাদিকৰ কেমেৰাৰ পৰা ভিডিঅ’ ডিলিট কৰাৰো অভিযোগ উত্থাপিত হৈছে অতিৰিক্ত আৰক্ষী সঞ্চালক প্ৰধানগৰাকীৰ বিৰুদ্ধে ৷
জানিব পৰা মতে, শুকুৰবাৰে অসম আৰক্ষীৰ অতিৰিক্ত আৰক্ষী সঞ্চালক প্ৰধান (ADGP) হৰমিত সিঙৰ নেতৃত্বত কাছাৰ আৰক্ষীৰ এটা দলে এটা পথ নিৰ্মাণৰ বাবে সীমান্তৱৰ্তী ধলাখালত উপস্থিত হৈছিল ৷ দীৰ্ঘদিন ধৰি মিজোসকলে এই পথ নিৰ্মাণত বাধা আৰোপ কৰি আহিছিল ৷ যাৰ বাবে দল-বলে সেইস্থানত গৈ উপস্থিত হৈছিল অতিৰিক্ত আৰক্ষী সঞ্চালক প্ৰধান হৰমিত সিং ৷