চাঞ্চল্যকৰ অপহৰণ কাণ্ড: পাহাৰৰ পৰা উদ্ধাৰ অপহৃত

বঙাইগাঁৱত সংঘটিত হৈছে এক চাঞ্চল্যকৰ অপহৰণৰ ঘটনা । জিলাখনৰ খগৰপুৰ পাহাৰৰ জংঘলৰ পৰা বান্ধি থোৱা অৱস্থাত উদ্ধাৰ হৈছে দুই অপহৃত ৷

বঙাইগাঁও,13 ছেপ্তেম্বৰ: বঙাইগাঁৱত দেওবাৰে সংঘটিত হৈছে এক চাঞ্চল্যৰ ঘটনা । জিলাখনৰ খগৰপুৰ পাহাৰৰ জংঘলৰ পৰা বান্ধি থোৱা অৱস্থাত উদ্ধাৰ কৰা হৈছে দুগৰাকীকৈ ব্যক্তিক । দেওবাৰে প্ৰাতঃভ্ৰমণলৈ অহা দুগৰাকী স্থানীয় যুৱকে প্ৰত্যক্ষ কৰে ব্যক্তি দুগৰাকীক । উদ্ধাৰ হোৱা ব্যক্তি দুগৰাকীৰ অৱস্থা লক্ষ্য কৰি দুৰ্বৃত্তই অপহৰণ কৰি অনাৰ সন্দেহ প্ৰকাশ কৰিছে ৰাইজে ৷ ৰাইজে ঘটনা সম্পৰ্কে আৰক্ষীক অৱগত কৰাত ঘটনাস্থলীত আৰক্ষী উপস্থিত হৈ উদ্ধাৰ কৰে ব্যক্তি দুগৰাকীক ৷

ইতিমধ্যে উদ্ধাৰ হোৱা ব্যক্তি দুগৰাকী ক্ৰমে প্ৰবীৰ কুমাৰ মিশ্ৰ আৰু ৰাজু কুমাৰ মিশ্ৰ বুলি জানিব পৰা গৈছে ৷ ব্যক্তি দুগৰাকীয়ে জনোৱা অনুসৰি, ঝাৰখণ্ডৰজেএইচ 10 বিএক্স 8916 নম্বৰৰ এখন বিস্কুট কঢ়িওৱা ট্ৰাক গুৱাহাটী মহানগৰীৰ বেলতলাৰ পৰা অপহৰণ কৰি আনিছিল দুৰ্বৃত্তই । ট্ৰাকখনে ৰাজস্থানৰ পৰা বিস্কুট কঢ়িয়াই গৈ আছিল শিলচৰ অভিমুখে ৷ কিন্তু আদবাটতে 7/8 জনীয়া এটা দুৰ্বৃত্তৰ দলে ট্ৰাকখন অপহৰণ কৰি আনি চালক আৰু পৰিচালকক মাৰপিট কৰি খগৰপুৰ পাহাৰৰ জংঘলত বান্ধি থৈ বিস্কুট ভৰ্তি ট্ৰাকখন লৈ উধাও হয় দুৰ্বৃত্তৰ দলটো । শনিবাৰে নিশা সংঘটিত হোৱা এই ঘটনাৰ সম্পৰ্কে তদন্ত অব্যাহত ৰাখিছে বইটামাৰী থানাৰ আৰক্ষীয়ে ৷

লগতে চাওকঃকৰিমগঞ্জত পথ নিৰ্মাণত গাফিলতিৰ অভিযোগ