মাতৃয়ে শাক-পাচলি বিক্ৰী কৰে, মেধাৰ পৰিচয় দিলে পিতৃহাৰা মঞ্জিতে

প্ৰয়াত যজ্ঞ প্ৰসাদ উপাধ্যায় আৰু উৎপলা দেৱীৰ সন্তান মঞ্জিতে জয়মতী উচ্চতৰ মাধ্যমিক বিদ্যালয়ৰ পৰা পৰীক্ষাত অৱতীৰ্ণ হৈ ডিষ্টিংচন তথা আটাইকেইটা বিষয়তে লেটাৰ নম্বৰ লাভ কৰিবলৈ সক্ষম হৈছে ৷ অসমীয়াত 87, ইংৰাজীত 92, গণিতত 97, সাধাৰণ বিজ্ঞানত 93, সমাজ বিজ্ঞানত 88 আৰু হিন্দীত 81 নম্বৰেৰে মুঠ 538 নম্বৰ লাভ কৰে মেধাৱী ছাত্ৰগৰাকীয়ে ৷

বিহালী, 16 মে' :পিতৃয়ে কেতিয়াবাই ইহসংসাৰ ত্যাগ কৰিলে ৷ মাতৃয়ে শাক-পাচলি বিক্ৰী কৰি কোনোমতে দুবেলা দুমুঠিৰ যোগাৰ কৰি আহিছে ৷ তাৰ মাজতে বুধবাৰে ঘোষিত হাইস্কুল শিক্ষান্ত পৰীক্ষাত জিলিকি উঠিল বিশ্বনাথৰ বৰাজুলী গাঁৱৰ মঞ্জিৎ উপাধ্যায় নামৰ ছাত্ৰগৰাকী ৷ প্ৰয়াত যজ্ঞ প্ৰসাদ উপাধ্যায় আৰু উৎপলা দেৱীৰ সন্তান মঞ্জিতে জয়মতী উচ্চতৰ মাধ্যমিক বিদ্যালয়ৰ পৰা পৰীক্ষাত অৱতীৰ্ণ হৈ ডিষ্টিংচন তথা আটাইকেইটা বিষয়তে লেটাৰ নম্বৰ লাভ কৰিবলৈ সক্ষম হৈছে ৷ অসমীয়াত 87, ইংৰাজীত 92, গণিতত 97, সাধাৰণ বিজ্ঞানত 93, সমাজ বিজ্ঞানত 88 আৰু হিন্দীত 81 নম্বৰেৰে মুঠ 538 নম্বৰ লাভ কৰে মেধাৱী ছাত্ৰগৰাকীয়ে ৷
কিন্তু পিতৃহাৰা মঞ্জিতে অভাৱ-অনাটনৰ মাজতো এনেদৰে সুখ্যাতিৰে উত্তীৰ্ণ হ'লেও ছাত্ৰগৰাকীৰ অধ্যয়ন অব্যাহত ৰখাৰ ক্ষেত্ৰত সমস্যাৰ সন্মুখীন হৈছে শাক-পাচলি বিক্ৰী কৰি পৰিয়াল পোহপাল দিয়া মাতৃ উৎপলা দেৱী ৷ সেয়ে এখন ভাল শিক্ষানুষ্ঠানত নামভৰ্তি কৰাই দিবলৈ অপাৰগ মাতৃয়ে মেধাৱী ছাত্ৰগৰাকীৰ বাবে বিচাৰিছে সহৃদয় লোকৰ সহায় ৷ অনাটনী ঘৰ এখনৰ পৰা সাফল্যৰ বাটত খোজ দিয়া মঞ্জিৎ উপাধ্যায়ক সহায় কৰিবনে কোনো সদাশয় লোকে?