3 বজাৰ দহটা শীৰ্ষ খবৰ...

3 বজাৰ দহটা শীৰ্ষ খবৰ...

2019 ত Cigna Corporation, TTK Group আৰু Manipal Group এ চলোৱা 'Well-Being Survey' ত এই কথা পোহৰলৈ আহিছে যে প্ৰায় 82 শতাংশ ভাৰতীয়ই কাম, স্বাস্থ্য আৰু অৰ্থিক বিষয়ক লৈ চাপত ডুবি থাকে ৷ মহিলাৰ তুলনাত পুৰুষসকল অধিক চাপগ্ৰস্ত হৈ থাকে ৷ চাৰ্ভেত প্ৰকাশ পোৱা অনুসৰি, 84 শতাংশ পুৰুষে বিভিন্ন কাৰণত চাপত ডুবি থাকে, এই সংখ্যাৰ বিপৰীতে মহিলাৰ সংখ্যা 10 শতাংশ কম অৰ্থাৎ 74 শতাংশ ৷

ডবকা সংৰক্ষিত বনাঞ্চল(Dabaka Reserve Forest)লৈ নামি আহিছে তীব্ৰ ভাবুকি ৷ ফ’ৰলেন(Four Lane Road)যুক্ত ঘাইপথ নিৰ্মাণৰ নামত কাটি পেলোৱা হ’ব বনাঞ্চলখনৰ পাঁচ সহস্ৰাধিক মূল্যৱান গছ । ই বনাঞ্চলখনৰ বৃহৎ ক্ষতিসাধন কৰাৰ লগতে ইয়াৰ সৌন্দৰ্য আৰু জীৱকূলৰ মাজত ব্যাপক প্ৰভাৱ পেলাব বুলি আশংকা কৰা হৈছে ৷

মিজোৰামৰ বিভিন্ন অঞ্চলত প্ৰায় 12,939 গৰাকী ম্যানমাৰ শৰণাৰ্থীয়ে আশ্ৰয় গ্ৰহণ কৰি আছে ৷ ইয়াৰে ভিতৰত 1,518 গৰাকী শৰণাৰ্থীৰ তথ্য এতিয়াও সংগ্ৰহ কৰা হোৱা নাই ৷ এই সংখ্যা সঘনে সলনি হৈ আছে যিহেতু দেশখনৰ পৰা শৰণাৰ্থীৰ প্ৰৱেশ এতিয়াও অব্যাহত আছে ৷

তালিবানৰ কু-কৰ্মই জোকাৰিছে দেশ তথা বিশ্ব ৷ আফগানিস্তানত সংখ্যালঘু হিচাপে চিহ্নিত ১৮০ গৰাকী শিখ সম্প্ৰদায়ৰ ব্যক্তিৰ ওপৰত তালিবানে চলাইছে অকথ্য নিৰ্যাতন ৷ আফগানিস্তানত নিৰ্যাতিত হিন্দুসকলক ভাৰতলৈ অনাৰ বাবে প্ৰধানমন্ত্ৰীৰ হস্তক্ষেপ বিচাৰিছে নিৰ্যাতিতসকলে ৷

মাৰ্কিন যুক্তৰাষ্ট্ৰৰ ষ্টেনফৰ্ড বিশ্ববিদ্যালয়ে বিশ্বৰ শীৰ্ষ বিজ্ঞানীৰ এখন তালিকা প্ৰকাশ কৰি উলিয়াইছে ৷ এই তালিকাত স্থান লাভ কৰিছে ভাৰতৰ বিভিন্ন বিশ্ববিদ্যালয় আৰু শৈক্ষিক প্ৰতিষ্ঠানৰ 2,042 গৰাকী ভাৰতীয় ৷

গোলাঘাটৰ মৰঙী ধলাখাট গাঁৱৰ পথাৰৰ মাজত 11 KV লাইনত বিদ্যুৎস্পৃষ্ট হৈ এজনী প্ৰাপ্তবয়স্ক মাইকী হাতীৰ মৃত্যু । ধাননি পথাৰত ধান খাই পুৱা উভতি যাওতেই সংঘটিত হয় এই কৰুণ ঘটনা । নিতৌ খাদ্যৰ সন্ধানত পথাৰখনৰ মাজত বিচৰণ কৰি আছিল প্ৰায় এশজনীয়া এটা বৃহৎ বন্যহস্তীৰ জাকে । মাইকী হাতীজনীৰ মৃত্যুৰ পাচতে ঘটনাস্থলীত বন বিভাগৰ লোক উপস্থিত হৈ মৰণোত্তৰ পৰীক্ষাৰ ব্যৱস্থা কৰিছে ।

‘পলাশৰ ৰং’ নামৰ বোলছবিখনৰ মূখ্য চৰিত্ৰত অভিনয় কৰা প্ৰবীণ অভিনেত্ৰী শেৱালি কাকতি শইকীয়া(Sewali Kakati Saikia) আৰু নাই ৷ শনিবাৰে নিশা 9.45 বজাত চিকিৎসাধীন অৱস্থাত গুৱাহাটী মেডিকেল কলেজ হাস্পতাল(GMCH)ত মৃত্যু হয় অভিনেত্ৰীগৰাকীৰ ৷

জোনাই চমকং লামাজান বিহিয়া গাঁৱত শনিবাৰে সূত্ৰপাত হয় এক ভয়ংকৰ অগ্নিকাণ্ডৰ ৷ কিন্তু অঞ্চলটোৰ ওচৰে পাজৰে কোনো অগ্নি নিৰ্বাপক বাহিনীৰ আস্থান নথকাৰ বাবে অগ্নিকাণ্ডত সকলো সা-সম্পত্তি হেৰুৱায় পৰিয়ালটোৱে ৷

ছবছৰীয়া নাবালিকা হত্যাকাণ্ড(Minor Girl Murder)ৰ বুজ ল’বলৈ শনিবাৰে কলিয়াবৰত উপস্থিত হয় অসম ৰাজ্যিক শিশু অধিকাৰ সুৰক্ষা আয়োগ(Assam State Commission for Protection of Child Rights)ৰ তিনিজনীয়া প্ৰতিনিধিৰ দল ৷ নাবালিকা আৰু অভিযুক্ত কিশোৰ তিনিটাৰ বাসগৃহত উপস্থিত হৈ স্থানীয় ৰাইজ আৰু জিলা প্ৰশাসনৰ সৈতে আলোচনাত মিলিত হয় দলটোৱে ৷

ধুবুৰীত সচেতন নাগৰিক মঞ্চৰ প্ৰতিবাদী সমদল ৷ বাংলাদেশত হিন্দু নাগৰিকৰ ওপৰত চলোৱা আক্ৰমণৰ বিৰোধিতা কৰি বিশাল প্ৰতিবাদী কাৰ্যসূচী ৰূপায়ণ কৰে সচেতন নাগৰিক মঞ্চই । সহস্ৰাধিক পুৰুষ-মহিলা, যুৱক-যুৱতীয়ে হাতে হাতে বেনাৰ, প্লে-কাৰ্ড আৰু জোঁৰ লৈ বাংলাদেশ চৰকাৰৰ বিৰুদ্ধে ক্ষোভ উজাৰে ৷