জনিয়া,15 জুন :শেহতীয়াকৈ বৰপেটাৰ কলগাছিয়াস্থিত ৰূপসী উন্নয়ন খণ্ডৰ কাৰ্যালয়ৰ একাংশ কৰ্মচাৰীৰ চূড়ান্ত দায়িত্বহীনতাই ৰাজ্য চৰকাৰৰ বিষয়া-কৰ্মচাৰী নিয়ন্ত্ৰণৰ ওপৰত থকা অসমৰ্থতা উদঙাই দিছে । স্বয়ং ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মাই(CM Himanta Bishwa Sarma) ক'ভিডৰ দুয়ো পালি প্ৰতিষেধক গ্ৰহণ কৰা প্ৰত্যেকজন চৰকাৰী বিষয়া-কৰ্মচাৰীক নিয়মিতভাৱে কাৰ্যালয়ত উপস্থিত থাকিবলৈ নিৰ্দেশ দিয়াৰ পিছতো এই নিৰ্দেশনাক লৈ কোনো ভ্ৰূক্ষেপ নাই একাংশ বিষয়া-কৰ্মচাৰীৰ । দিনৰ 11.30 বজাৰ পিছতো কাৰ্যালয়ত উপস্থিত নহয় অধিকাংশ বিষয়া-কৰ্মচাৰী ।
সোমবাৰে কাৰ্যালয়ত মাত্ৰ খণ্ড উন্নয়ন বিষয়াৰ(block development officer) লগতে এক তৃতীয়াংশ কৰ্মচাৰীকহে উপস্থিত হোৱা দেখা যায় ৷ ইয়াৰ বিপৰীতে দেখা পোৱা নগ’ল কোনো এজন কনিষ্ঠ অভিযন্তাক ৷ অধিকাংশ পঞ্চায়তৰ কামত নিয়োজিত কৰ্মচাৰীৰ অনুপস্থিতিত প্ৰয়োজনীয় কাৰ্য সম্পাদন কৰিবলৈ গাঁও পঞ্চায়ত(GP) এলেকাৰ ৰাইজ এতিয়া বিপাঙত পৰিছে ৷