বৰপেটাত বন্যাৰ্তক খাদ্য সামগ্ৰী বিতৰণ ৰাম সেনাৰ

খাদ্য সামগ্ৰীকে ধৰি বিভিন্ন সমস্যাত পৰা বানাক্ৰান্ত লোক সকলক সহায় কৰা উদ্দেশ্যে বৰপেটাত উপস্থিত হয় ৰাম সেনা ৷ শতাধিক বানাক্ৰান্ত লোকৰ মাজত বিতৰণ কৰে চাউল,দাইল,আলুকে ধৰি বিভিন্ন খাদ্য সামগ্ৰী ৷

বৰপেটা, ২৭ জুলাইঃ ৰাজ্যত দীৰ্ঘ দিন ধৰি নেৰানেপেৰা বৰষুণৰ ফলত বিভিন্ন জিলাত ভয়ংকৰ বান পৰিস্থিতিৰ সৃষ্টি হয় ৷ ঠিক একেদৰে বৰপেটাতো প্ৰলয়ংকৰী বান পৰিস্থিতিৰ সৃষ্টি হৈছে ৷ উক্ত বানত লোক সকলৰ ঘৰ-দুৱাৰ,কৃষি ভূমিৰ লগতে হাজাৰ হাজাৰ পশুধনৰ বিস্তৰ ক্ষতি সাধন হয় ৷ ইতিমধ্যে বানাক্ৰান্ত লোকসকলৰ ঘৰ দুৱাৰৰ ক্ষতি হোৱাত বহু লোকে আশ্ৰয় শিবিৰত আশ্ৰয় গ্ৰহণ কৰিবলগীয়া পৰিস্থিতিৰ সৃষ্টি হৈছে ৷ ইফালে আশ্ৰয় শিবিৰত থকা লোক সকলৰ খোৱা খাদ্য সামগ্ৰীকে ধৰি বহু সমস্যাত পৰিবলগা হৈছে ৷

ইফালে বানত ক্ষতিগ্ৰস্ত লোকসকলক সহায়ৰ বাবে আগবাঢ়ি আহে ৰাম সেনা ৷ ৰাজ্যখনৰ প্ৰায় সকলোবোৰ জিলাতেই ৰাম সেনাই বান সাহায্য বিতৰণৰ বাবে গ্ৰহণ কৰিছে এক প্ৰশংসনীয় পদক্ষেপ ৷ সেই অনুসৰি বৰপেটাৰ বিভিন্ন প্ৰান্তৰ আশ্ৰয় শিবিৰ সমুহত আশ্ৰয় গ্ৰহণ কৰি থকা বানাক্ৰান্ত লোকসকলৰ বাবে সোমবাৰে চাউল,দাইলকে আদি কৰি বিভিন্ন খাদ্য সামগ্ৰী বিতৰণ কৰে সংগঠনটোৰ সদস্য সকলে ৷

ৰাম সেনাই বৰপেটা চহৰৰ লগতে জিলাখনৰ বিভিন্ন প্ৰান্তৰ আশ্ৰয় শিবিৰত খাদ্য সামগ্ৰী বিতৰণ কৰিব বুলি সংগঠনটোৰ সদস্য সকলে সাংবাদিকৰ আগত সদৰি কৰে ৷ ৰাম সেনাই বন্যাৰ্ত লোকসকলৰ প্ৰতি আগবঢ়োৱা সহায় সহযোগৰ বাবে শলাগ লৈছে বানত ক্ষতিগ্ৰস্ত ৰাইজে ৷

লগতে পঢ়ক- পানীৰ মাজৰ জৰাজীৰ্ণ জুপুৰীত আবদ্ধ এটা পৰিয়াল