বৰপেটা, ১৫ এপ্ৰিল: আজি পহিলা ব'হাগ । অসমবাসীয়ে পালন কৰিছে হেঁপাহৰ ৰঙালী বিহু(Rangali Bihu 2022) । চৌদিশ মুখৰিত ঢোল-পেঁপা গগনাৰ মাতত । কঁকাল ঘূৰাই এপাক নাচিছে সকলোৱে । ব্যতিক্ৰম নহয় বৰপেটা ।
বৰপেটাৰ বিহু মূলতঃ সত্ৰকেন্দ্ৰিক(Bihu in Barpeta Satra) । বৰপেটাত ঢোল পেঁপা গগনা বিহু নামৰ পৰিৱৰ্তে সম্পূৰ্ণ সত্ৰীয়া ৰীতিৰে পৰিশীলিত ৰূপত পালন কৰা হয় ব'হাগ বিহু ৷ বৰপেটাত স্থানীয় ভাষাত ব'হাগ বিহুক কোৱা হয় বৈহাগ'ৰ দোমাহি ৷
সত্ৰীয়া পৰম্পৰা আৰু ৰীতি নীতিৰে বৰপেটা সত্ৰত ব'হাগ বিহু পালন
চ'তৰ সংক্ৰান্তিৰ পৰা সাতদিন জুৰি পালন কৰা বৈহাগ’ৰ দোমাহিৰ আজি পহিলা ব’হাগৰ দিনটোত বৰপেটা সত্ৰত পালন কৰা হৈছে বৰ দোমাহি ৷ বৰ দোমাহি উপলক্ষে সত্ৰত সেৱা জনাবলৈ সত্ৰবাসী ভক্তপ্ৰাণ লোকসকল আহি সত্ৰত ভিৰ কৰিছে ৷ পুৱা নাম-প্ৰসংগৰ পিছত সত্ৰৰ গায়ন বায়নে গুৰুঘাট বজায় ৷