আৰ্থিক অনাটনে আত্মহত্যালৈ ঠেলিলে নৱ দম্পতীক

বৃহস্পতিবাৰে বৰপেটাৰোডত চিপজৰী লৈ একেলগে আত্মহত্যা এটা নৱ দম্পতীৰ ৷ আৰ্থিক অনাটনৰ বাবে এনে সিদ্ধান্ত লোৱা বুলি চুইচাইড নোটত লিখি থৈ যায় দম্পতীটোৱে ৷

বৰপেটাৰোড,27 মে’ : বৰপেটাৰোডত বৃহস্পতিবাৰে এটা নৱ দম্পতীয়ে চিপজৰী লৈ একেলগে আত্মহত্যা কৰা ঘটনাই অঞ্চলজুৰি তীব্ৰ চাঞ্চল্যৰ সৃষ্টি কৰিছে ৷ আত্মহত্যা কৰা নৱ দম্পতীটো ছানিদুল ইছলাম (20) আৰু উৰ্মিলা খাতুন (18) বুলি জানিব পৰা গৈছে ৷

পৰিয়ালৰ লোকে জনোৱা মতে, দুমাহ পূৰ্বে বৰপেটাৰোডৰ উত্তৰ আঠিয়াবাৰী নিৱাসী ছানিদুল ইছলামে সৰভোগৰ পোৰাগাঁৱৰ জীয়ৰী উৰ্মিলা খাতুনৰ সৈতে বিবাহপাশত আৱদ্ধ হৈছিল ৷ নৱ দম্পতীটোৱে বৃহস্পতিবাৰে বহু দেৰিলৈকে টোপনিৰ পৰা উঠি নহাত পৰিয়ালৰ লোকে দুৱাৰত টোকৰ মাৰে ৷ কিন্তু, ঘৰৰ ভিতৰত কোনো শব্দ নোপোৱাত বেৰৰ ফাকেৰে দুয়োকে একেলগে চিপজৰী লৈ থকা অৱস্থাত প্ৰত্যক্ষ কৰে ৷ ইয়াৰ লগে লগে ঘৰখনত হুৱাদুৱাৰ সৃষ্টি হয় ৷

ইয়াৰ পাচতে বৰপেটাৰোড আৰক্ষীক খবৰ দিয়ে স্থানীয় ৰাইজে ৷ আৰক্ষীয়ে উত্তৰ আঠিয়াবাৰীত উপস্থিত হৈ দণ্ডাধীশৰ উপস্থিতিত দম্পতীটোৰ মৃতদেহ উদ্ধাৰ কৰে ৷ আৰ্থিক দিশত অতিকৈ দুৰ্বল দম্পতীটোৱে কি কাৰণত আত্মহত্যা কৰিলে সেয়া চুইচাইড নোটযোগে উল্লেখ কৰি থৈ যায় ৷

চুইচাইড নোটত উল্লেখ কৰা অনুসৰি, স্বামী-স্ত্ৰী হিচাপে দুয়োৰে মাজত যথেষ্ট ভালপোৱা আছিল ৷ সেয়ে দুয়োকে কবৰস্থানত একেলগে কবৰস্থ কৰাৰ কথাও তেওঁলোকে চুইচাইড নোটত উল্লেখ কৰি থৈ যায় ৷ ইতিমধ্যে দম্পতীটোৰ মৃতদেহ দুটা মৰণোত্তৰ পৰীক্ষাৰ বাবে বৰপেটালৈ প্ৰেৰণ কৰিছে আৰক্ষীয়ে ৷

লগতে পঢ়ক :বকোৰ জৱেপাৰাত জোঁৱায়েকৰ হাতত প্ৰাণ হেৰুৱালে শাহুৱেকে