জনীয়াত ভোটদানৰ পৰা বঞ্চিত শতাধিক ভোটাৰ

জনীয়াৰ ১১৮ নং খাতাৰটাৰী ভোটকেন্দ্ৰত ভোটদানৰ পৰা বঞ্চিত শতাধিক ভোটাৰ । ইভিএমৰ বিসংগতি আৰু প্ৰিজাইডিং বিষয়াৰ হেমাহিৰ বাবে ভোটাধিকাৰৰ পৰা শতাধিক ভোটাৰ ৰাইজ বঞ্চিত হোৱাৰ অভিযোগ । ঘটনাক কেন্দ্ৰ কৰি উত্তপ্ত পৰিস্থিতি ৷

জনীয়া,6 এপ্ৰিল: মঙলবাৰে সামৰণি পৰে ৪০ টা সমষ্টিৰ তৃতীয় তথা অন্তিম পৰ্যায়ৰ নিৰ্বাচন । বৰপেটা জিলাৰ ৪৪ নং জনীয়া বিধানসভা সমষ্টিৰ প্ৰায়বোৰ কেন্দ্ৰতেই শান্তিপূৰ্ণভাৱে নিৰ্বাচন অনুষ্ঠিত হৈ যায় ৷ বৰপেটা জিলাৰ ১১৮ নং খাতাৰটাৰী ভোটকেন্দ্ৰটোত কিছু বিসংগতিৰ ফলত শতাধিক লোকে ভোটাধিকাৰ সাব্যস্ত কৰাৰ পৰা বঞ্চিত হোৱাৰ অভিযোগ উত্থাপন হৈছে ।

অভিযোগ অনুসৰি, প্ৰিজাইডিং বিষয়াৰ হেমাহিৰ বাবে আৰু ইভিএম বিকল হোৱাত প্ৰায় দুঘণ্টা সময় পলম হোৱাৰ বাবেই শতাধিক ভোটাৰ ৰাইজে গণতান্ত্ৰিক অধিকাৰ সাব্যস্ত কৰাৰ পৰা বঞ্চিত হ'বলগীয়া হৈছে ।

আনহাতে, কেন্দ্ৰটোৰ দায়িত্বত থকা প্ৰিজাইডিং বিষয়াই প্ৰায় সংখ্যক লোকেই ভোটাধিকাৰ সাব্যস্ত কৰিছে বুলি জানিবলৈ দিয়ে । কিন্তু ইভিএমৰ বিসংগতিৰ কাৰণে সময়ৰ অপচয় হোৱা বুলিও স্বীকাৰ কৰে বিষয়া গৰাকীয়ে । ইফালে ভোটাধিকাৰৰ পৰা বঞ্চিত হোৱাত ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে ।

লগতে পঢ়ক:২৮ বছৰ পাচত ডি ভোটাৰে সাব্যস্ত কৰিলে ভোটাধিকাৰ