অংগনবাড়ী কেন্দ্ৰৰ কৰ্মীৰ বিৰুদ্ধে ব্যাপক দুৰ্নীতিৰ অভিযোগ

বস্তাই বস্তাই পচিছে শিশুসকলৰ বাবে চৰকাৰে যোগান ধৰা চাউল মটৰৰ লগতে ছাটু পেকেট ৷

জনীয়া,9 আগষ্টঃ বৰপেটা জিলাৰ ৰূপসী সংহত শিশু উন্নয়ন সেৱা আঁচনিৰ অধীনস্থ ৩২ নং কাচুগাটি অংগনবাড়ী কেন্দ্ৰৰ কৰ্মীৰ বিৰুদ্ধে ব্যাপক দুৰ্নীতিৰ অভিযোগ ৷ অংগনবাড়ী কেন্দ্ৰটোৰ কৰ্মী মনোৱাৰা খাতুন ব্যাপক দুৰ্নীতিত লিপ্ত হোৱাৰ অভিযোগ উত্থাপন হৈছে ৷ অভিযোগ অনুসৰি, যোৱা ৫ জুলাইত কেন্দ্ৰটোৰ শিশু সকলৰ বাবে বিভাগৰ পৰা চাউল যোগান ধৰা হৈছিল । কিন্তু দুৰ্নীতিৰ অভিযোগত সাঙুৰ খোৱা কৰ্মী গৰাকীয়ে সম্পূৰ্ণ এমাহত শিশু সকলৰ মাজত চাউলখিনি বিতৰণ নকৰি পচি যোৱাৰ পাছত ৫ আগষ্টত পচা চাউল বিতৰণ কৰিব ধৰাত একাংশ সচেতন ৰাইজৰ দৃষ্টি গোচৰ হোৱাত সাংবাদিকৰ জৰিয়তে কৰ্মীৰ দুৰ্নীতিৰ বিৰুদ্ধে সমাজ কল্যাণ বিভাগ তথা বৰপেটা জিলা উপায়ুক্তক অৱগত কৰে ৷ কেৱল সেয়াই নহয় তিনিমাহৰ পূৰ্বে অহা চাউল আজি পৰ্যন্ত বিতৰণ কৰা নাই কৰ্মীগৰাকীয়ে ৷ শিশুৰ পুষ্টিৰ বাবে চৰকাৰে যোগান ধৰা ৩৭ পেকেট ছাটু বৰ্তমান পৰ্যন্ত জমা কৰি ৰখাৰ অভিযোগ উত্থাপন হৈছে ৷

ইফালে অংগনবাড়ী কেন্দ্ৰৰ কৰ্মী জনৰ বিৰুদ্ধে সহায়িকাগৰাকীয়েও অভিযোগ তুলি ব্যক্ত কৰিছে যে, সহায়িকাই সময় মতে এইসমূহ সামগ্ৰী বিতৰণ কৰিবলৈ কৈ থাকে যদিও কৰ্মীগৰাকীয়ে সহায়িকাৰ এই কথাত কোনো গুৰুত্ব প্ৰদান নকৰে ৷ কৰ্মীয়ে নিৰ্ভয়ে এনে দুৰ্নীতি সংঘটিত কৰি যোৱাৰ ক্ষেত্ৰত কেন্দ্ৰটোৰ ছুপাৰভাইজৰে সহায়ৰ হাত আগবঢ়াই আহিছে বুলি জনাই স্থানীয় ৰাইজে ৷ লগতে অভিভাৱকে সামগ্ৰী বিচাৰি আপত্তি প্ৰদৰ্শন কৰিলে অমাৰ্জিত ব্যৱহাৰ কৰাৰো গুৰুতৰ অভিযোগ উঠিছে কৰ্মী মনোৱাৰা খাতুনৰ বিৰুদ্ধে।