বৰপেটা, 11 মে':সোমবাৰে সম্পূৰ্ণ ৰাজ্যিক মৰ্যাদাৰে শেষকৃত্য সম্পন্ন কৰা হয় বৰপেটাৰ মহীৰূহ গোকুল পাঠকৰ । দেওবাৰে নিশা প্ৰায় ৮:30 বজাত দেহাৱসান ঘটে বৰপেটাৰ ৰত্ন গৰাকীৰ । সোমবাৰে বৰপেটাৰ অংকুৰম হাস্পতালৰ পৰা বৰপেটা জিলা ছাত্ৰ সন্থাৰ কাৰ্যলয়লৈ নিয়া হয় লোক সংস্কৃতিৰ সাধক গৰাকীৰ নশ্বৰদেহ । জিলা ছাত্ৰ ছাত্ৰ সন্থাৰ কাৰ্যালয়ত আছুৰ মুখ্য উপদেষ্টা ড৹ সমুজ্জ্বল কুমাৰ ভট্টাচাৰ্য, আছুৰ কেন্দ্ৰীয় সমিতিৰ কেবাগৰাকীও নেতাৰ লগতে, আছু সদস্য সকলে শেষ শ্ৰদ্ধা নিবেদন কৰে বৰপেটা সত্ৰৰ ইতিহাস গ্ৰন্থৰ প্ৰণেতা গৰাকীলৈ ।
পৰৱৰ্তী সময়ত গোকুল পাঠকৰ মৃতদেহ বৰপেটা প্ৰেছ ক্লাৱলৈ নিয়া হয় আৰু প্ৰেছ ক্লাৱ চৌহদত বৰপেটা জিলা উপায়ুক্ত, মুনীন্দ্ৰ শৰ্মা, বৰপেটাৰ আৰক্ষী অধীক্ষক ডা৹ ৰবীন কুমাৰ, বৰপেটা প্ৰেছ ক্লাৱ, বৰপেটা শাখা সাহিত্য সভা, বৰপেটা জিলা সাহিত্য সভা, অসম সাহিত্য সভাকে ধৰি বিভিন্ন গল সংগঠনৰ প্ৰতিনিধিয়ে শেষ শ্ৰদ্ধা নিবেদন কৰে । বৰপেটা প্ৰেছ ক্লাৱৰ পৰা গোকুল পাঠকৰ নশ্বৰ দেহ বৰপেটা পৌৰ সভাৰ খেলপথাৰত ৰখা হয় । সাহিত্যিকগৰাকীৰ নশ্বৰ দেহ নিজ ঘৰলৈ লৈ যোৱাৰ পিচতে এক শোকাকুল পৰিবেশৰ সৃষ্টি হয় ৷ কান্দোনত ভাঙি পৰে আত্মীয় স্বজনৰ তথা গুণমুগ্ধ সকল । ইয়াৰ পিচতে তেওঁৰ শেষ ইচ্ছা অনুসৰি, নশ্বৰ দেহ সৎকাৰৰ বাবে লৈ যোৱা হয় তেওঁ নিজ হাতে প্ৰতিষ্ঠা কৰা শংকৰ মাধৱ মহাবিদ্যালয় আৰু তেওঁ পুনৰ প্ৰতিষ্ঠা কৰা ভাতকুছি সত্ৰৰ মধ্যস্থলত । সৰভোগৰ বিধায়ক তথা বিজেপিৰ ৰাজ্যিক সভাপতি ৰঞ্জিৎ কুমাৰ কুমাৰ দাসৰ উপস্থিতিত, আৰক্ষীৰ তিনি জাই টোপধ্বনিৰ পিচতেই সাহিত্যিকগৰাকীৰ অন্ত্যেষ্টিক্ৰিয়া ৰাজ্যিক মৰ্যাদাৰে সম্পন্ন কৰা হয় ।