এখন ভঙা দলং আৰু বিপৰ্যস্ত জনজীৱন

কলগাছিয়াত ভঙা দলঙেৰে যাতায়ত কৰিব লগা হৈছে ৰাইজে । নিম্নমানৰ দুৰ্বল কাঠেৰে দলং নিৰ্মাণ কৰাত জহি খহি গৈছে কলগাছিয়াৰ পৰা আমগুৰিলৈ যোৱা কাঠৰ দলং। ব্যাহত হৈ পৰিছে জৰুৰীকালীন সেৱা।

কলগাছিয়া, 8 মে’: কলগাছিয়াৰ পি ডব্লিউ ডি আইবিৰ কাষতে থকা মৰা বেঁকী নদীৰ ওপৰত নিৰ্মিত কলগাছিয়াৰ পৰা আমগুৰি গাঁৱলৈ যোৱা জৰাজীৰ্ণ কাঠৰ দলং খনে জলা কলা খুৱাইছে ৰাইজক । প্ৰায় ৫ বছৰ পূৰ্বে নিম্নমানৰ কাঠেৰে নিৰ্মাণ কৰাৰ দলংখন ভাঙি যোৱাত দুবাৰকৈ মেৰামতি কৰা হৈছিল যদিও, এতিয়া পুনৰ জহিখহি যোৱা দলং খন আনকি, মোহাৰি দিলেই কাঠ ভাঙি যোৱা অৱস্থাত আছে । ইফালে, দলঙত বাইক বা মানুহ উঠিলেই ভূমিকম্প অহাৰ দৰে কঁপি থাকে দলংখন। তথাপি, মৰণত শৰণ দি এই দলং খনকে সাৰথি কৰিব লগা হয় ৰাইজ ।

উল্লেখযোগ্য যে, দুৰ্বল দলঙেৰে কোনো জৰুৰীকালীন এম্বুলেন্স, অগ্নিনিৰ্বাপক বাহন আদি পাৰ হ’ব নোৱাৰাৰ ফলত কান্ধত নাইবা ঠেলা ৰিক্সাৰে অনা নিয়া কৰিব লগা হয় ৰোগী । যাৰ ফলত দীৰ্ঘদিন ধৰি কলগাছিয়া, আমগুৰি আদি গাঁৱৰ হাজাৰ হাজাৰ ৰাইজে দুৰ্ভোগ ভুগিব লগা হৈছে । অৱশেষত, এতিয়া নতুনকৈ কাৰ্যকাল লাভ কৰা চৰকাৰখনে শীঘ্ৰে দলংখন পকীকৰণ কৰাৰ দাবী উত্থাপন কৰিছে ৰাইজে ৷

লগতে পঢ়ক :দিল্লীত হাইভল্টেজ বৈঠকৰ পিচতে হিমন্ত বিশ্ব শৰ্মাৰ প্ৰতিক্ৰিয়া