সম্প্ৰীতিৰ নিদৰ্শনেৰে কয়াকুছিত ৰঙালীৰ আয়োজন

পহিলা ব'হাগৰ পৰা বৰপেটাৰ কয়াকুছিত বিহু উদযাপন কৰিব সংখ্যালঘু সম্প্ৰদায়ৰ লোকসকলে

বৰপেটা,১৪ এপ্ৰিলঃ ৰঙালীৰ ৰঙেৰে ভৰুণ হৈ আহিল প্ৰাণৰ উছৱ, যৌৱনৰ উছৱ, জাতীয় উৎসৱ ৰঙালী বিহু ৷ অসমৰ প্ৰতিটো জাতি জনগোষ্ঠীয়ে অতীজৰে পৰাই পালন কৰি আহিছে বিহু উৎসৱ ৷ বড়ো, ৰাভা, দেউৰী, সোণোৱাল-কছাৰী, কোচ ৰাজবংশী আদিকে ধৰি ৰাজ্যখনত বসবাস কৰা প্ৰতিটো জাতি-জনগোষ্ঠীৰ জীৱনৰ সৈতে বিহু সম্পৰ্কিত হৈ আছে ৷ অসমৰ জাতীয় উৎসৱ বিহু ৰাজ্যখনৰ ধৰ্মীয় সংখ্যালঘু সম্প্ৰদায়ৰ লোকসকলেও পালন কৰি আহিছে ৷ বৰপেটাৰ কয়াকুছিৰ সংখ্যালঘু সম্প্ৰদায়ৰ সংখ্যালঘু যুৱতীসকল এতিয়া ব্যস্ত হৈ পৰিছে বিহু নাচৰ কৰ্মশালাত ৷ অসমৰ বাপতি সাহোন ব'হাগৰ বিহুটিত ধৰ্মীয় সংখ্যালঘু সম্প্ৰদায়ৰ এইসকল যুৱতী তথা কিশোৰীয়ে কঁকাল ঘূৰাই নাচিবলৈ এইদৰে ভাগ লৈছে বিহু নাচৰ কৰ্মশালাত ৷

ইফালে পহিলা ব'হাগৰ পৰা কয়াকুছিত দুদিনীয়াকৈ অনুষ্ঠিত হ’ব ৰঙালী বিহু ৷ বিভিন্ন বিহু দলৰ লগতে কয়াকুছিৰ বিহুত ভাগ ল’ব মঞ্জু বৰা, আছুৰ সম্পাদক লুৰীণজ্যোতি গগৈ, আমছুৰ নেতৃবৃন্দৰ লগতে অসমৰ বহুকেইগৰাকী বিখ্যাত বিহুৱা বিহুৱতীৰ লগতে কেইবাটাও বিহু দলে । সাহিত্যিক ইছমাইল হুছেইনৰ উদ্যোগত সংখ্যালঘুসকলে আয়োজন কৰা ৰঙালী বিহুৰ কাৰ্যসূচীত অংশগ্ৰহণ কৰিবলৈ সমূহ ৰাইজক আহ্বান জনাইছে ইছমাইল হুছেইনে ৷