নকল সোণৰ বেপাৰ কৰি 27 লাখ টকাসহ আৰক্ষীৰ জালত ছাহজাহান

বৰপেটাৰ এজন নকল সোণৰ ব্যৱসায়ীৰ পৰা আৰক্ষীয়ে উদ্ধাৰ কৰিছে 27 লাখ 11 হাজাৰ 480 টকা ৷ নকল সোণেৰে প্ৰৱঞ্চনা কৰি অহা বেপাৰীজনক ইতিমধ্যে গ্ৰেপ্তাৰ কৰিছে বৰপেটা আৰক্ষীয়ে ৷

বৰপেটা, ২৫ জুন: জাপে জাপে টকা উদ্ধাৰ কৰা হৈছে সোণৰ এজন চোৰাং ব্যৱসায়ীৰ পৰা ৷ বৰপেটাৰ ছাহজাহান আলী নামৰ নকল সোণৰ ব্যৱসায়ীজনে লুকুৱাই ৰখাৰ অৱস্থাত উদ্ধাৰ কৰা হয় বৃহৎ পৰিমাণৰ ধনৰাশি ৷

মেঘালয় আৰক্ষীৰ খবৰৰ ভিত্তিত বৰপেটা আৰক্ষীয়ে শনিবাৰে অভিযান চলাই গ্ৰেপ্তাৰ কৰে ছাহজাহান আলী নামৰ নকল সোণৰ ব্যৱসায়ীজনক (Fake gold smuggler in Barpeta)৷ ধৃত ছাহজাহান আলীৰ ঘৰ বৰপেটাৰ গৰৈমাৰীৰ বানিয়াৰাপাৰা গাঁৱত বুলি জানিব পৰা গৈছে ৷ ছাহজাহান আলীয়ে ম্যানমাৰৰ পৰা অহা সোণৰ চোৰাং সৰবৰাহ কৰি অহা বুলি জানিব পৰা গৈছে ৷

ধৃত ছাহজাহান আলীৰ ঘৰৰ পৰা আৰক্ষীয়ে জব্দ কৰে নগদ ২৭ লাখ ১১ হাজাৰ ৪৮০ টকা ৷ ঘৰৰ বিভিন্ন স্থানত লুকুৱাই ৰখা অৱস্থাত উদ্ধাৰ কৰা হয় টকাখিনি ৷

উল্লেখ্য যে, শুকুৰবাৰে মেঘালয় আৰক্ষীয়ে শ্বিলঙত গ্ৰেপ্তাৰ কৰিছিল যশু মিঞা নামৰ আন এজন সোণৰ চোৰাং ব্যৱসায়ীক (Meghalaya police arrested fake gold smuggler) ৷ যশু মিঞাৰ স্বীকাৰোক্তিৰ ভিত্তিতে মেঘালয় আৰক্ষীৰ খবৰৰ ভিত্তিত অভিযান চলাই বৰপেটাৰ বানিয়াৰাপাৰা গাঁৱৰ পৰা ছাহজাহান আলীক গ্ৰেপ্তাৰ কৰে বৰপেটা আৰক্ষীয়ে (Barpeta Police)৷

প্ৰাপ্ত তথ্য মতে, ইতিমধ্যে মেঘালয় আৰক্ষীৰ এটা দল বৰপেটা সদৰ থানাত উপস্থিত হৈছে ৷ শনিবাৰ অৰ্থাৎ আজি মেঘালয় আৰক্ষীয়ে ধৃত ছাহজাহান আলীক নিজৰ জিম্মাত লোৱা বুলি জানিব পৰা গৈছে ৷

লগতে পঢ়ক:ডিফুত প্ৰায় ১১ কোটি টকা মূল্যৰ নিচাজাতীয় সামগ্ৰী জ্বলালে আৰক্ষীয়ে