জনীয়া, 16 জুন :কলগাছিয়া খণ্ড প্ৰাথমিক স্বাস্থ্য কেন্দ্ৰৰ কৃত্ৰিম বানৰ সমস্যা এইবাৰ সমাধান কৰা হ’ব ৷ এই দাবী বৰপেটা জিলাৰ উপায়ুক্ত তেজ প্ৰসাদ ভূষালৰ । বিগত কেইবাদিন ধৰি হৈ থকা নেৰানেপেৰা বৰষুণৰ ফলত গুৱাহাটী মহানগৰীকে ধৰি ৰাজ্যৰ বিভিন্ন প্ৰান্তত সম্প্ৰতি কৃত্ৰিম বানে এক অৱৰ্ণনীয় পৰিস্থিতিৰ সৃষ্টি কৰিছে(Incessant rainfall brings artificial floods) ৷
বৰপেটা জিলাতো কৃত্ৰিম বানৰ ফলত সাধাৰণ জনতাই হাৰাশাস্তিৰ সন্মুখীন হ’বলগীয়া হৈছে(Artificial floods in Barpeta) ৷ বিশেষকৈ কলগাছিয়া খণ্ড প্ৰাথমিক স্বাস্থ্যকেন্দ্ৰটোও কৃত্ৰিম বানৰ কৱলত পৰাত চিকিৎসাৰ ক্ষেত্ৰত সমস্যাৰ সন্মুখীন হ’বলগীয়া হৈছে চিকিৎসালয়ৰ কৰ্মচাৰীৰ লগতে ৰোগী ৷ চিকিৎসালয় চৌহদত নলা নথকাৰ বাবেই প্ৰত্যেক বছৰে কৃত্ৰিম বানৰ বাবে যমৰ-যাতনা ভোগ কৰিবলগীয়া হয় চিকিৎসালয়খনৰ কৰ্মচাৰীৰ লগতে সাধাৰণ ৰাইজে ।
এইবাৰো কেইবাদিন ধৰি হৈ থকা নেৰানেপেৰা বৰষুণৰ ফলত চিকিৎসালয়খনৰ কাৰ্যালয়কে ধৰি প্ৰত্যেকটো কোঠাতে একাঁঠু পৰ্যন্ত পানী জমা হৈ কাৰ্যালয়খনৰ বহু নথি-পত্ৰ আৰু ঔষধ নষ্ট হোৱা বুলি জানিবলৈ দিয়ে চিকিৎসালয় কৰ্তৃপক্ষই । ইয়াৰোপৰিও চিকিৎসালয়খনৰ কৰ্মচাৰীৰ আবাসিক কোঠাতো পানী সোমোৱাত তেওঁলোক ব্যাপক সমস্যাৰ সন্মুখীন হয় ৷ এনে পৰিস্থিতিত অতি সোনকালে চিকিৎসালয়খনৰ চৌদিশে নলা-নিৰ্মাণ কৰি কৃত্ৰিম বানৰ সমস্যা সমাধানৰ দাবী উত্থাপন কৰে ভুক্তভোগী কৰ্মচাৰীয়ে ।
কলগাছিয়া খণ্ড প্ৰাথমিক স্বাস্থ্যকেন্দ্ৰ উল্লেখ্য যে, ২০২১ চনত চিকিৎসালয়খনত কৃত্ৰিম বানৰ সৃষ্টি হোৱাত বিভাগীয় কৰ্তৃপক্ষই নলা নিৰ্মাণ কৰাৰ বাবে ব্যৱস্থা গ্ৰহণ কৰিও সেয়া সাময়িকভাৱে স্থগিত ৰাখিছিল । কলগাছিয়া ৰাজহ চক্ৰৰ চক্ৰ বিষয়া চন্দনা বৰুৱা চিকিৎসালয়খনৰ চৌহদত উপস্থিত হৈ পৰিস্থিতিৰ বুজ লয় । চক্ৰ বিষয়াগৰাকীৰ পাছতেই বৰপেটা জিলাৰ উপায়ুক্ত তেজ প্ৰসাদ ভূষালো চিকিৎসালয়খনত উপস্থিত হয় আৰু এইবাৰ কোনো বাধাই নেমানো বুলি মন্তব্য কৰি কৃত্ৰিম বানৰ সমস্যা সমাধান কৰাৰ দাবী কৰে ৷
লগতে পঢ়ক :Artificial floods in Barpeta : কৃত্ৰিম বানৰ কবলত বৰপেটাৰ হাউলি
