বৰপেটাৰ বানপীড়িতৰ কাষত কন্ঠশিল্পী দীক্ষু
ৰাজ্যত অব্যাহত বিধ্বংসী বানত জুৰুলা হৈছে নৈপৰীয়া ৰাইজ ৷ বানত বহুতেই হেৰুৱাইছে নিজৰ ঘৰ-দুৱাৰ ৷ বানত সকলা হেৰুওৱা দুৰ্গত সকললৈ যিয়ে যেনেকৈ পাৰে আগবঢ়াইছে সহায়ৰ হাত ৷ শিল্পী জুবিন গাৰ্গৰ পাছত কেইগৰাকীমান সুহৃদৰ সৈতে বৰপেটাৰ বানপীড়িতৰ কাষলৈ ঢপলিয়াই আহিল কন্ঠশিল্পী দীক্ষু ৷
বৰপেটা,21 জুলাইঃ অসমৰ হাৰ্টথ্ৰৱ জুবিন দাৰ পাছত বন্যাতৰ্ৰ কাষত এইবাৰ জনপ্ৰিয় কন্ঠশিল্পী দীক্ষু ৷ দীক্ষু ইনিচিয়েটিভ ফাউন্ডেচনৰ উদ্যোগত বহুকেইজন সমাজহিতৈশী ব্যক্তিৰ সহযোগত বৰপেটাৰ গনককুছি পথাৰহাটীৰ বানপীড়িত লোকৰ মাজত শিল্পীগৰাকীয়ে বিতৰণ কৰিলে সাহায্য সামগ্ৰী ৷ গনককুছি পথাৰহাটীৰ বানপীড়িতসকলৰ মাজত চাউল, চেনি, দাইল, মিঠাতেল, বিস্কুট, চিৰা, মূৰি, কাপোৰ, ঔষধ, চেনিটেৰী নেপ্কিনকে ধৰি পৰিয়ালৰ বাবে লাগতিয়াল বহু সামগ্ৰী বিতৰণ কৰে শিল্পীগৰাকীয়ে ৷ শিল্পীগৰাকীয়ে লগতে জনাই যে বানপীড়িতসকলক বান সাহায্য প্ৰদান কৰাৰ সমান্তৰালভাৱে বানৰ পিছতো স্বাস্থ্য আৰু স্বচ্ছতাৰ ক্ষেত্ৰতো বিশেষ পদক্ষেপ গ্ৰহণ কৰিব দীক্ষু ইনিচিয়েটিভ ফাউন্ডেচনে ৷ আনহাতে, অহা 23 জুলাইত জুবিন গাৰ্গ ফেন ক্লাৱ আৰু কলাগুৰু আৰ্টিষ্ট ফাউণ্ডেছ্নৰ উদ্যোগত চানমাৰি খেলপথাৰৰ পৰা আৰম্ভ হ'বলগীয়া বান সাহায্য সংগ্ৰহ অভিযানত অংশগ্ৰহণ কৰাৰ কথা জানিবলৈ দি সকলোকে সহায়ৰ হাত আগবঢ়াবলৈ আহ্বান জনাইছে দীক্ষুৱে ৷