বাক্সা,৯ ছেপ্টেম্বৰ :যাতায়ত ব্যৱস্থাৰ ক্ষেত্ৰত ন ন উদ্ভাৱন হৈছে বিশ্বৰ ভিন্ন প্ৰান্তত । সুৰক্ষিত,দ্ৰুত যাতায়ত ব্যৱস্থাৰ ক্ষেত্ৰত বিভিন্ন পদ্ধতি অৱলম্বন কৰি উজলিছে বহু দেশ । কিন্তু এনে সময়তো অসমৰ যাতায়ত ব্যৱস্থাৰ কিছুমান দৃশ্য দেখিলে আপোনাৰ চকু কপালত উঠিব ।
অসমৰ বাক্সা জিলাৰ এটা অঞ্চলৰ লোকে আজিও এখন সাধাৰণ নাৱক সাৰথি কৰি বাকী অঞ্চলৰ সৈতে দৈনিন্দিন যাত্ৰা অব্যাহত ৰাখিছে । হয় এতিয়াও যাতায়তৰ ক্ষেত্ৰত বহু গুণে পিছপৰি আছে বাক্সা জিলাৰ শালবাৰী মহকুমাৰ অন্তৰ্গত বেতবাৰী অঞ্চল । অঞ্চলটোত থকা পহুমাৰা নৈৰ ওপৰত এখনো দলং নথকাৰ ফলত চৰম হাৰাশাস্তি ভূগিবলগীয়া হৈছে অঞ্চলটোৰ ৰাইজে ।
শিক্ষাৰ্থীসকলে প্ৰতিদিনে বিদ্যালয় অথবা মহাবিদ্যালয়লৈ নৈৰ মাজেৰে যাত্ৰা কৰিবলগীয়া হয় । ইফালে ২০১৮ চনতে নৈ খনৰ ওপৰত এখন দলং নিৰ্মাণৰ কাম আৰম্ভ হৈছিল । কিন্তু সম্প্ৰতি দলং নিৰ্মাণৰ কামো অতি লেহেমীয়া হৈছে । যাৰ বাবে নিৰ্মাণকাৰী প্ৰতিষ্ঠান তথা ঠিকাদাৰৰ বিৰুদ্ধে সৰৱ হৈ পৰিছে স্থানীয় লোকসকল ।