বাক্সাত গা ধুবলৈ গৈ সলিল সমাধি এজন যুৱকৰ

বাক্সাৰ বৰনদীত গা ধুবলৈ গৈ সলিল সমাধি এজন যুৱকৰ ৷ নৈখনৰ প্ৰৱল সোঁতে বহুদূৰলৈ উটুৱাই নিয়াৰ ফলতে অকাল মৃত্যুক সাৱটি ল'বলগীয়া হয় যুৱকজনে ।

বাক্সা, 23 আগষ্টঃবাক্সা জিলাৰ তামুলপুৰৰ মেচগুৰি গাঁৱত সংঘটিত হয় এটা শোকাৱহ ঘটনা ৷ বগমাটিৰ বৰনদীত গা ধুবলৈ গৈ সলিল সমাধি ঘটে এজন যৱকৰ ৷ মৃত যুৱকজনৰ নাম খেম শৰ্মা(২৫) ৷

উল্লেখ্য যে,দেওবাৰে দুপৰীয়া তামুলপুৰৰ মেচগুৰি গাঁৱৰ কেইজনমান যুৱকে বগমাটিৰ বৰনদীত গা ধুবলৈ গৈছিল ৷ যুৱক কেইজনে গা ধুই থকা অৱস্থাতে ভুটানৰ পৰা বৈ অহা খৰস্ৰোতা নৈ খনৰ সোঁতে উটুৱাই নিয়ে খেম শৰ্মাক ৷ নৈখনৰ পানীত যুৱকজন উটি যোৱা দেখি সমনীয়া সকলে বচাবলৈ চেষ্টা কৰে যদিও ৰক্ষা কৰিব নোৱাৰিলে যুৱকজনক ৷ ইফালে নৈখনৰ প্ৰৱল সোঁতে বহুদূৰলৈ উটুৱাই নিয়াৰ ফলতে অকাল মৃত্যুক সাৱটি ল'বলগীয়া হয় যুৱকজনে । ঘটনাস্থলীৰ পৰা প্ৰায় ১ কিলোমিটাৰ দূৰত হে যুৱকজনৰ মৃতদেহটো উদ্ধাৰ কৰিবলৈ সক্ষম হয় ।

ইফালে পৰৱৰ্তী সময়ত নৈৰ পাৰত থিয় হৈ থকা কেইজনমান লোকে নৈত মৃতদেহটো উটি অহা প্ৰত্যক্ষ কৰে ৷ লগে লগে উক্ত ঘটনাটো নাগ্ৰীজুলি আৰক্ষী চকীত খবৰ দিয়ে স্থানীয় লোকসকলে ৷ ইতিমধ্যে ঘটনাস্থলীত আৰক্ষী উপস্থিত হৈ যুৱকজনৰ মৃতদেহ উদ্ধাৰ কৰি নাগ্ৰীজুলি আৰক্ষী চকীলৈ লৈ‌ যায় । উক্ত ঘটনাটোৰ বাবে সমগ্ৰ অঞ্চলতে এতিয়া শোকৰ ছা পৰিছে ।

লগতে পঢ়ক- দুধনৈত দুৰ্ঘটনা: থিতাতে নিহত 2, আহত 4