নিউজ ডেস্ক, 7 আগষ্ট: দেওবাৰে ২০২৩ চনৰ এছিয়ান চেম্পিয়নছ ট্ৰফী হকীৰ এখন খেলত মালয়েছিয়াক ৫-০ গ’লত পৰাস্ত কৰিলে ভাৰতে৷ কাৰ্তি চেলভাম (১৫ মিনিট) আৰু উপ-অধিনায়ক হাৰ্দিক সিং (৩২ মিনিট)ৰ লগতে অধিনায়ক হৰমনপ্ৰীত সিং (৪২ মিনিট), গুৰজন্ত সিং (৫৩ মিনিট), আৰু জুগ্ৰাজ সিং (৫৪মিনিট) ভাৰতৰ হৈ গ’ল কৰে ৷ এই ফলাফলে ভাৰতক পইন্ট তালিকাৰ শীৰ্ষস্থানলৈ লৈ যায় ৷ যাৰ ফলত তেওঁলোকে ছেমিফাইনেলত অন্তৰ্ভুক্তিৰ অধিক ওচৰ চাপিবলৈ সক্ষম হৈছে ৷
ভাৰতে প্ৰথম কোৱাৰ্টাৰত আক্ৰমণাত্মক নোটত আৰম্ভ কৰিছিল, মালয়েছিয়াৰ বক্সত প্ৰৱেশ কৰাৰ ওচৰ চাপিছিল আৰু কিছুমান অতি স্পষ্ট গ’ল দিয়াৰ সুযোগ সৃষ্টি কৰিছিল ৷ ইফালে, মালয়েছিয়াৰ ফিত্ৰী ছাৰীয়ে অষ্টম মিনিটত তীব্ৰ ইন্টাৰচেপচনৰ বাবে গ্ৰীণ কাৰ্ড লাভ কৰে ৷ প্ৰথম কোৱাৰ্টাৰ শেষ হোৱাৰ লগে লগে হৰমনপ্ৰীতে কোনো সংকেত নোহোৱাকৈ মালয়েছিয়াৰ বক্সৰ ফালে দৌৰি গৈ চেলভামক ভিতৰলৈ বলটো পাছ কৰি দিয়ে আৰু তেওঁ অনায়াসে টেপ কৰি আয়োজক দলটোক অগ্ৰগতি দিয়ে ৷
পৰৱৰ্তী কোৱাৰ্টাৰৰ আৰম্ভণিতে ভাৰতৰ বিবেক সাগৰে গ্ৰীণ কাৰ্ড লাভ কৰে৷ অৱশ্যে ভাৰতে দুটামান পেনাল্টি কৰ্ণাৰকে ধৰি অদম্য আক্ৰমণৰে খেলি থাকে ৷ বিৰতিৰ পূৰ্বে দুটা দৃষ্টান্তত পুনৰ ওচৰ চাপি আহিছিল যদিও সুযোগৰ সৰ্বোত্তম ব্যৱহাৰ কৰিব নোৱাৰিলে, কিয়নো মালয়েছিয়াই কিছু কঠিন ৰক্ষণশীল দক্ষতা প্ৰদৰ্শন কৰি হাফটাইমত ১-০ গ’লত বান্ধি ৰাখিলে মেচখন ৷
লগতে পঢ়ক:Stuart Broad retirement: অৱসৰক স্মৰণীয় কৰি থৈ গ'ল ষ্টুৱাৰ্ট ব্ৰডে
দ্বিতীয় ইনিংছ আৰম্ভণিৰ পিছত ভাৰতীয় দলটোৱে নিজৰ অগ্ৰগতি বৃদ্ধি কৰিবলৈ বেছি সময় নালাগিল ৷ তৃতীয় কোৱাৰ্টাৰত মাত্ৰ দুইমিনিটমান বাকী থকা অৱস্থাত হৰমনপ্ৰীতৰ প্ৰাৰম্ভিক ফ্লিকটো গ’লৰক্ষকে পেৰিং কৰি দিয়াৰ পিছত মিডফিল্ডাৰ হাৰ্দিকে ৰিবাউণ্ডৰ পৰা পেনাল্টি কৰ্ণাৰটো সফলতাৰে গ’ললৈ ৰূপান্তৰিত কৰে ৷
মালয়েছিয়াইও তাৰ পিছত কোৱাৰ্টাৰত পেনাল্টি কৰ্ণাৰ লাভ কৰে যিটো নাজমি জাজলানে সফলতাৰে গ’ললৈ ৰূপান্তৰিত কৰে ৷ কিন্তু ভাৰতীয় দলটোৱে ভিডিঅ’ ৰেফাৰেলৰ বাবে আবেদন জনোৱাত বিপজ্জনক ফ্লিকৰ দোহাই দি গ’লটো বাতিল কৰাত ভাৰতৰ সমৰ্থকৰ মাজত উল্লাস বৃদ্ধি পায় ৷ ৩৩ আৰু ৩৭ মিনিটত নীলকান্ত শৰ্মা আৰু প্ৰসাদে হালধীয়া কাৰ্ড পোৱাৰ বিপৰীতে ৪২ মিনিটত ভাৰতে একেৰাহে তিনিটা পেনাল্টি লাভ কৰে, আৰু তৃতীয়টো পেনাল্টি হাৰ্দিকে গ’ললৈ ৰূপান্তৰিত কৰে ৷ ফাইনেল কোৱাৰ্টাৰৰ লগে লগে দুয়োটা দলে নিজৰ গতি বৃদ্ধি কৰিলে যদিও ভাৰতেই প’ছেছনত আধিপত্য বিস্তাৰ কৰিছিল ৷
দুটামান কৰ্ণাৰৰ সুযোগৰ অন্তত ৫৩ মিনিটত ভাৰতীয় দলৰ হৈ চতুৰ্থটো গ’লত গুৰজন্তই শ্বট দিয়ে ৷ চাৰিটা গ’ল কৰাৰ পিছতো মেন ইন ব্লুৱে গতি লেহেমীয়া কৰা দেখা নগ’ল ৷ কিয়নো এক মিনিটৰ পাছত জুগ্ৰাজে সফলতাৰে আন এটা পেনাল্টি কৰ্ণাৰ গ’ললৈ ৰূপান্তৰিত কৰি অগ্ৰগতি বৃদ্ধি কৰে ৷ মেচখনৰ সামৰণি পৰ্যায়ৰ কাষ চাপি অহাৰ লগে লগে ভাৰতে তীব্ৰতাৰে খেলা অব্যাহত ৰাখিছিল ৷ ইয়াৰ পিছত সোমবাৰে ভাৰতে ডিফেণ্ডিং চেম্পিয়ন দক্ষিণ কোৰিয়াৰ বিৰুদ্ধে খেলিব, আনহাতে মালয়েছিয়াই জাপানৰ বিৰুদ্ধে খেলিব ৷
