স্পৰ্টছ ডেস্ক,২৯ আগষ্ট :এছিয়া কাপ ২০২৩ টুৰ্ণামেণ্টত ভাৰতীয় দলৰ বাবে প্ৰথম পচন্দ বুলি কোৱা উইকেটকিপাৰ বেটছমেন কে এল ৰাহুল পাকিস্তান আৰু নেপালৰ বিৰুদ্ধে প্ৰতিযোগিতাখনৰ প্ৰথম দুখন খেলৰ বাবে উপলব্ধ নহ'ব পাৰে । দলৰ মুখ্য প্ৰশিক্ষক ৰাহুল দ্ৰাবিড়েও প্ৰতিযোগিতাখন আৰম্ভ হোৱাৰ পূৰ্বে এক সংবাদমেলত এই কথা নিশ্চিত কৰিছে ।
প্ৰশিক্ষক ৰাহুল দ্ৰাবিড়ে কয় যে ৰাহুলৰ আঘাতৰ প্ৰগতি অতি ভাল । কিন্তু কে এল ৰাহুল ২ ছেপ্টেম্বৰত পাকিস্তানৰ বিৰুদ্ধে আৰু ৪ ছেপ্টেম্বৰত নেপালৰ বিৰুদ্ধে গ্ৰুপ পৰ্যায়ৰ খেলৰ বাবে উপযুক্ত নহ'ব । তেওঁ জনোৱা মতে এই দুয়োখন খেল পাল্লেকেলেত খেলা হ'ব ।
ৰাহুল দ্ৰাবিড়ৰ মতে অহা কেইদিনমানৰ বাবে তেওঁ এনচিএত থাকিব । য'ত তেওঁক নিৰীক্ষণ কৰা হ'ব । ৪ ছেপ্টেম্বৰত তেওঁক পুনৰ মূল্যাঙ্কন কৰা হ'ব আৰু তাৰ পাছত তেওঁক দলত ল'ব পৰা যাব বুলি প্ৰশিক্ষকগৰাকীয়ে উল্লেখ কৰে ।
অৱশ্যে, যেতিয়া এছিয়া কাপ ২০২৩ৰ বাবে দল ঘোষণা কৰা হৈছিল, ৰাহুলক কেৱল চৰ্ত সাপেক্ষে সুস্থ বুলি গণ্য কৰা হৈছিল কিয়নো তেওঁ আই পি এল ২০২৩ৰ সময়ত হোৱা আঘাতৰ পৰা সম্পূৰ্ণৰূপে আৰোগ্য হৈছিল । ইয়াৰ বাবে, তেওঁ এনচিএ-ত পুনৰ্বাসন কৰি আছে । বাছনিৰ পাছত মুখ্য নিৰ্বাচক অজিত আগৰকাৰে যোৱা সপ্তাহত দল ঘোষণাৰ সময়ত ৰাহুলৰ আঘাতৰ কথা ঘোষণা কৰিছিল ।
বেংগালুৰুৰ ৰাষ্ট্ৰীয় ক্ৰিকেট একাডেমীৰ চিকিৎসকৰ দলটো ৰাহুলৰ বেটিঙৰ ওপৰত সন্তুষ্ট কিন্তু তেওঁৰ উইকেটকিপিং নিৰীক্ষণ কৰি থকা হৈছে । যোৱা সপ্তাহত এনচিএৰ দ্বাৰা আয়োজিত এক অনুশীলন খেলৰ পাছত তেওঁ বিষ অনুভৱ কৰিছিল বুলি জানিব পৰা গৈছে । যাৰ বাবে তেওঁলোকে অলপ অপেক্ষা কৰিবলৈ বাধ্য হৈছে ।
ইফালে দলটোত উইকেটকিপিং বিকল্প হিচাপে ঈশান কিষণ আছে । আনহাতে সঞ্জু চেমছনক দলটোৰ সৈতে সংৰক্ষিত হিচাপে ৰখা হৈছে । লক্ষণীয়ভাৱে এছিয়া কাপত সৰ্বাধিক খিতাপ অৰ্জন কৰা ভাৰতীয় দলটোৰ বাবে এইবাৰৰ প্ৰতিযোগিতা অতি গুৰুত্বপূৰ্ণ হিচাপে বিবেচিত হৈছে । দলটোৱে পুনৰ এবাৰ খিতাপ অৰ্জনৰ বাবে চেষ্টা চলাব ।
লগতে পঢ়ক :Asia Cup 2023 : এছিয়া কাপ সম্পৰ্কে জানিবলগীয়া কেইটামান গুৰুত্বপূৰ্ণ কথা
